Aizawl: Mizoram uisa zuarte chuan lehkha felfai tak nen ui an lalut thin niin an sawi. Thuchhuah an siamah uisa zuar pawl chuan ui an lakluhte chu check gate-ah Vety Doctor-ten an check hmasa vek nia sawiin chhiah pawh an chawi thlap tih an sawi a. “Prevention of Cruelty to Animal Act 1960 dan kalh lovin kan ui lakluhte hi a hrehawm lo thei ang bera phurh thin an ni a, a phurhna tur motor pawh a bika siam ngat hman a ni. Chuvangin, uisa zuarten dan kalh leh ran chunga ngilnei lo ang hiala lantir hi thil dik lo a ni tih mipuite kan hriattir a ni,” an ti. Uisa zuar pawl chuan Mizote chu uisa ei hnam kan ni tiin ram changkang zawk ah pawh uisa chu an ei tih an sawi a. Uisa an ei avangin khawvelin a hmuh hniam phah lo nia an sawiin mi thenkhatin an eizawnna an sawisel leh an dem thin chu na an ti hle tih an sawi.