Guinness World Records-in a tarlan danin, Ms Karenjeet Kaur Bains hian minute khat chhunga hmeichhe squat tam ber record a nei thar a, he intihsiaknaah hian anmahni taksa buk rih zawng zat zel an chawi a ni.

Kum 25 mi Karenjeet Kaur Bains hian minute khat chhungin a taksa buk rih zat ang chu vawi 42 squat pui theiin record a siam tih Guinness World Records chuan a tarlang. Powerlifting champion Bains hian kum 17 mi lek a nih aṭangin he infiamna hi a luhchilh a, vawi tam tak a champion tawh bawk.

Mipa infiamna ang hiala ngaih nimahse hmeichhe tam takin an ti ve thin tho a, British Sikh hmeichhia zinga Great Britain aiawha powerlifting-a tel hmasa ber ni bawkin Guinness World Records hial a siam thei ta a ni. 

"Guinness World Records title ka hlawhchhuak thei hi ka chhuang hle a ni. Powerlifting-a Great Britain aiawha British Sikh hmeichhe kal hmasa ber ka nih mai bakah, official-a world record neitu ka nih avangin history-ah hmun pawimawh tak ka chang tawh tur hi thil ropui tak a ni," tiin Bains chuan Guinness World Record a hrilh.

Ms Karenjeet-i pa Kuldip pawh hi powerlifter a ni a, a pa hnung zuiin midang te tana kawngkhar hawntu a nih a beisei thu BBC a hril.

Social media-ah Ms Karenjeet Kaur Bains hi a active hle a, a powerlifting ti lai video te post fovin, nula te chu an fitness vawng uluk turin a fuih thin a ni.