Tennis player ropui Roger Federer chuan Ukraine indo avanga naupang tanpui ngai te tanpuina tur £379,223 a pek tur thu a sawi. UN lam sawi danin thla hmasaa Russia ten Ukraine an run atang khan mi maktaduai 3 chuang an ral tlan tawh a, ral tlan zingah hian naupang thahnem tak an tel a ni. Federer hian a pawisa thawh hi tlawmngai pawl kal tlangin a hlan ang. 
   

Twitter kal tlangin kum 40 mi Federer chuan, “Kan chhungkuain Ukraine rama thil thleng thlalak te kan hmuh thin a, pawisawi lo nunau tawrhna nasa tak hi rapthlak kan ti em a, kan rilru a na tak meuh bawk. Kan chhungkua chuan he indo na hi kan thlawp lo,” a ti. "Team leh mimal angin ral tlan te hi nasa taka chhawmdawl an ni a, khawvel-a a mi chengte inpum khatna tur hian infiamna khawvel hian a thawhhlawk hle a ni," tiin Daniel Walden, Unicef's UK senior emergencies specialist chuan BBC Sport a hrilh.
   

Charity atan hian Real Madrid chuan euro million khat an theh chhuak tawh a, an sum hmang hian Red Cross leh United Nations High Commissioner for Refugees (UNHCR) ten tanpui ngai te an tanpui ang. Juventus chuan refugee te thiar turin an bus an thawh chhuak bawk. kar hmasa khan refugee 80 chu hmun him lamah phurh luh an ni a, atlangpuiin nu leh nupang te an ni.

Middlesbrough chuan FA Cup-a an ticket hralna zawng zawng Ukrainian te tan an hlan bawk. FA Cup quarter-final ah Middlesbrough hian nimin khan an mualah Chelsea an mikhual a ni.