NLUP Implementing Board chairman JH Rothuama chuan, "NLUP hi mi thenkhat, ei ral mai mai tur emaw ti pawl an awm a, chuvangin strict zawkin kalpui kan tum tawh a ni," tiin a sawi. NLUP thuneitu sang Apex Board din a niin Chief Minister Chairman a ni a, JH Rothuama MLA vice chairman niin Chief Secretary chu Secretary a ni a, NIB Secretary chu Asst. Secretary a ni. Hemi hnuaiah hian NLUP Implementing Board din leh a ni a, chairman ah JH Rothuama MLA, vice chairman ah PL Thanga, Secretary ah NIB Secretary te ruat an ni. NLUP 1st leh 2nd phase hi sem zawh a ni tawh a, 3rd phase leh 4th phase hi sem thuai tum a ni. Kum 2009 June ni 19 khan NLUP sum hman tur ruahman vaibelchhe 2,526.98 chu Planning Commission ah thehluh a ni a. Prime Minister hova Cabinet Committee on Economic Affairs (CCEA) thukhawm chuan August 2010 khan kum 5 atan vaibelchhe Rs.2,873.13 pek a remti.

Aizawl; NIB Chairman JH Rothuama chuan NLUP sum hmuh belh dan tur United Nations in a dapsak dawn niin a sawi. Mizoram Journalists Association hruaitute nen an inkawmnaah NIB chairman chuan he thu hi a sawi a. “ UN team lo kalte khan NLUP chu tha an ti hle a, Mizoram chu puih an tum a ni,” a ti. Vice Chairman PL Thanga pawhin central sawrkar tharin NLUP ah harsatna siam lovin a scheme chu tha an ti hle niin a sawi a, sum lamah pawh harsatna an tawklo tih a sawi. Tunhnaia UN Team lo zin te chuan NLUP hmalakna atan vaibelchhe 25 an ruahman nia sawiin kumin chhungin hmathar an la dawn tih a sawi a. "UN nena tang hova hetiang hmalakna hi India ram state dang ah a la awm lo a, NLUP hi a hma aiin a vul zawk turah kan ngai a ni" a ti. Vice chairman chuan NLUP thawk thalo chu a laklawh ah pawh an chhawk zel dawn niin a sawi bawk a ni. NIB chairman chuan NLUP chu a bikin Mamit leh Kolasib district ah a hlawhtling hle tih a sawi a, hmun tam takah chuan beisei phaklohna an nei tih a sawi bawk. NIB chairman chuan khawthlang lamah uar zawka rubber chin an tum tih sawiin, "rubber kung 1000 neih chuan thla tin nuai 2/3 a lak luh theih dawn a, Tripura ah hlawhtling taka an chin theih avangin kan ramah pawh hlawhtlin pui theih kan beisei a ni," a ti.