Steven Gerrard thlak tura an lak, kum 51-a upa Spaniard Unai Emery chuan a club thar Aston Villa-ah chuan trophy lak ngei a duh thu a sawi. Europe lamah pawh lo champion tawh coach tawn hriat nei tha hian eng nge a thlenpui dawn tih chu hunin ala hril ang chu.

Unai Emery-a'n Aston Villa a enkawl hnua a match hmasa pahnih chu Manchester United ve ve a ni teh tlat a, a hmasa zawk chu zanin hian Premier-ah an home-ah an khel ang a, nilaini zanah EFL Cup, third round khel turin Old Trafford lam an pan thung ang.   

Unai Emery chuan Aston Villa manager a nih a a thil chak ber sawi chhuakin trophy chawi a ni. Europe lama khel tura a hruai luh hmain a thil duh hi tih hlawhtlin ngei a duh thu a sawi bawk. 

Kum 51-a upa Spaniard hian zanin hian a hmasa ber turin match a hmachhawn ang. Aston Villa tana a game hmasa ber nimah se Arsenal manager hlui hi Premier League lamah chuan a mikhual lutuk bikin a rinawm loh a, May 2018 leh November 2019 inkar khan Arsenal a lo enkawl tawh thin a ni.

Inkhelh tur chungchanga an kawmnaah Villarreal boss hlui hian,"Ka duhthusam chu Aston Villa nena trophy chawi hi a ni," tiin a sawi. "Heng thil hi chu keimah mimal challenge ka insiamna a ni a, ka duhthusam pahnihna chu Europe-a khelh a ni bawk," a ti.

Emery hian 2019 Europa League final-ah Arsenal a hruai thleng a, final-ah Chelsea hmachhawnin 4-1 in an tlawm pui. Season khat a enkawl chhungin Premier League-ah pangana a nihpui thei a, Champions League erawh a khelpui phak lo chiah a ni. Thla 18 chauh a kaihhruai hman tihin November, 2019 khan an ban a ni.

Spaniard hian European competition lamah hlawhtlinna a chang ve nual tawh a, Sevilla chu Europa League-ah tum thum zet kum 2014, 2015 leh 2016 chhung khan a zawnin a champion pui thei ngat a ni. 

Arsenal a chhuahsan hnuah La Liga club Villareal a zawm a, club-in European title an lak hmasak ber tur atan coach pawimawh niin 2021 Europa League final-ah Manchester United chu penalty hmangin 11-10 in an hneh a ni. 

Tunah chuan chu tawnhriat chu hmang tangkaiin Aston Villa tan hlawhtlinna a thlen theih a in beisei a, 1996-a League Cup an chawi hnuah trophy la chawi lo leh lo Villa lam pawhin beiseina an nei lian ve hle.

Steven Gerrard ban a nih hnua Villa manager atana ruat Emery chuan,"Khawvela team tam tak ka hmachhawn tawh a, English team-te hi hmachhawn harsa ka tih an ni. Tin, Premier League hi khawvel-a league ropui ber a ni mek bawkin ka hria," a ti. 

Sawi zawmin,"Team tin hian Arsenal-a ka awm lai khan anmahni nena kan khelh danah tawnhriat engemaw zat min pe a. Europe-ah kum 15 chhung a zawnin khelh ka zir a, English team tam tak lakah ka zir thiam tawh bawk a ni. He hmuna ka awm thei hi ka lawm hle. Hetah hian lo kal ka tum a, a chhan chu project ropui tak a nih vang a ni. Thawkleh khatah kan ropui hluai lo maithei, a tahtawlin kan kal ang," a ti. 

Thil tam tak tih ka duh laiin tunah rih chuan ngaihpawimawh hmasak tur a nei rih a, zanin hian Manchester United nen an inkhel dawn a, Villa manager anga Premier League match a hmachhawn hmasak berah Erik ten Hag-a naute an mikhual dawn a ni. Nilaini khian third-round EFL Cup-ah Old Trafford an pan ve leh thung ang.