ZALEN June 7, 2026 : Synod Prison Ministry-in Mizorama jail tangte an zirchiannaah jail tang zinga 39.6% chu unau pianpui pali leh a chung lam nei chinte an ni a, unau pianpui nei lo leh pathum thleng nei belhkhawm chu 60.4% an ni a. Unau piang tam zingah jail tang an tlem zawk tih hmuh chhuah a ni.

Mizoram Presbyterian Kohhran hnuaia Synod Prison Ministry-in Mizoram chhunga jail 10 an zirchianna atanga a lan danin khawpuiah sualna a pung nasa a. Central Jail, Women’s Jail leh Aizawl District Jail-a tang belhkhawm hi Mizoram-a jail tang zawng zawng atanga chhutin 60.5% an tling a, chung zingah chuan Aizawl khawpui (AMC area) pawn lam mi 46.6% an tling a. Tang zawng zawng 59.8% chu AMC area pawn an ni a, a chhung 40.2% an ni.

Zirchianna atanga a lan danin jail tang zingah mipa an tam lawr lak a. Kum 2024 khan Mizoramah mihring 14,72,992 an awm a, a tam zawk chu hmeichhia an ni a. Zirchianna atanga a lan dan chuan tuna tang mek zinga 91.4% chu mipa an ni a, hmeichhia 8.4% an awm bawk.

Tang zingah thalai an tam ber a, kum 18 atanga 40 inkar chu 76.7% an tling a. 69.7% chu nupui/pasal nei tawh niin pahnih pathum nei pawh 37.1% an tling.

Mizorama jail tang zingah lehkha zir sang lo an tamin tang zinga 91.3% chu pawl 12 leh a hnuai lam an ni a. Tang mek zingah chhungkaw innghahna leh ei bel ni bawk an tam ber a, 67.3% an tling.

Prison ministry zirchianna atanga a lan danin tang zinga 14.6% zet chu HIV positive an ni a. Tang zawng zawng zinga 96.9% chuan sex an hmang tawh tih an sawi a. Kum 18 tlin hmaa sex hmang tawh hi 58.3%, mi pakhat aia tam sex hmanpui 88.8% leh sex hman laia condom hmang lo 65.1% an awm bawk.

Jail hrang hranga an tan chhan lian/tam ber chu ruihhlo a ni a. Zu/drugs leh ruihhlo tawlhruk vanga tang hi tang zawng zawng atanga chhutin 47.8% an ni a, rukruk/mi rawk vanga tang 25.5%, pawngsual/POCSO kaihhnawiha 18% leh thil dang vanga tang 19.9% an ni.

Jail tan hmaa kohhrana rawngbawlna chanvo chelh zat hi 15.6% an nih bakah chhandamna/gospel camping-a vawi duai lo lut tawh 69% an ni bawk.

Tang zingah hian ruihtheil thil ti an tam hle a, 83.9% chu zu in, 42.3% chu heroin (No. 4) khawih, damdawi (tablet) khawih 24.2%, ganja zu thin 30.6%, methamphetamine khawih 8.2% an awm bawk.

Tang zinga 55.35% chu ruihhloa sumdawng an ni a, kum tlin hmaa ruihhlo khawih tan 48.8% awmin jail chhuah huna khawih zui tum 36.1% an awm.

1. Mizorama jail 10-ah zirchianna kalpui a ni a, Saitual erawh a la function loh avangin chhiar tel a ni lo.

2. Zirchianna neih lai hian tang 1,735 an awm a, an vaiin zawhna pek vek niin chhanna hi 1,452 (83.68%) a lut.

3. Jail tang zinga a tam zawk hi nu leh pa bula sei lian an ni a. Chhuah huna hawna tur nei 69.55% an awm bawk.

4. Tang zingah Sunday School kai hrim hrim 95.3% an awm a, lawmman dawng tawh 68.6% an awm bawk.

5. Khawpui leh ramri hrula district jail-ah tang an tam zual.   

6. Jail tang zingah chhung inkhawm nei ngai miah lo 11.5% an awm.

7. Tang zinga 11.5% chauh ruihhlo khawih lo an ni.

8. Jail tang zingah tang nawn 41.09% an awm.

9. Jail tang zinga 56.7% Presbyterian, 18.9% Baptist, 12.1% UPC an ni.

10. Tang zingah upa lam an awm nual a, a tlangpuiin kum 60 chung lam tan chhan tam ber hi POCSO a ni.