Aizawl: Union Home Minister Rajnath Singh chuan Zirtawpni khan Siaha leh Mamit district a tlawh a, mipui kalkhawm hmaah thu sawiin, “BJP kan sawrkar chuan thla 6 chhungin kawngpui tha kan siamsak ang che u,” a ti. Siaha District Playground-a thu a sawinaah Home Minister chuan, “India ramah change a thleng mek a, Mizoramah pawh change a thleng ve dawn a ni. Mizoram hian Development in mamawh a, chu mamawh chhanna chu BJP Candidate te lo thlang tling ula pek in ni dawn a ni,” a ti. Union Home Minister chuan, “Congress hian North East leh Mizoram hi ngaihthah takin kum tam tak an lo enkawl tawh a, BJP chuan North East hi tihhmasawn a duh a hma an sawn thei nan nasa takin hma a la a ni. Mizoram Congress sawrkar pawh hian a State tan kawngpui tha pawh a siam sak theilo a, kumin inthlan ah hian BJP inthlantlin chuan thlaruk chhungin Mizoram kawngpui zawng zawng hi kan siamthat sak vek dawn che u a ni,” a ti bawk. Autonomous District Council chungchang sawiin Union Home Minister chuan, “BJP Candidate te lo ti tling ula, Sixth Schedule hnuaiah District Council dinhmun hi kan ennawn sak dawn che u a, hemi chungchang hi ka team te nen kan sawiho vek tawh a ni,” a ti bawk.