Aizawl April 1, 2023 : Mizoram Pradesh Congress Committee hruaitu leh a hnuaia Department hruaitu te chuan vawiin khan Aizawl Sipai Lammual Gate bulah pungkhawmin, Union Home Minister Amit Shah hmaah tunhnaia All India Congress Committee (AICC) hotu Rahul Gandhi chunga rorel a nih dan duhlohna lantirna hun an hmang a, thuziak kengin an au rual bawk a ni.

Congress party chuan mipuite hriat atan a hnuaia mi ang hian thuchhuah an siam.

1. Rahul Gandhi thusawi avanga hetiang taka hremna a chunga lek a ni ta rum rum hi amah beih ngawr ngawr piah lamah sumdawng lian Adani te humhim tumna zawk a ni.

2. Parliament-a Rahul Gandhi-a’n Adani chungthu a sawi chhuah leh atanga ni kuanaah amah an puhna case kha tihnun leh nghal a ni a. Parliament-ah hian Rahul leh Kharge thusawi hi nasa taka tihbuai an ni a, tum thum lai ngenna siam mahse BJP Minister ten a thusawi tur an tihbuai bakah thusawina hun pek a ni lo. Hei hian a lantir ber chu Modi hian Adani nena an inzawmna hi Parliament lama sawichhuah a duh lo tihna a ni ber.

3. Sawrkar dinglai hian a tum bera lang chu an thil tihdik loh mipui hriata zau taka puanzar hi an duh lo a nih hmel a, hei vang hian mipui sukthlek kawihpen an tum ta ni berin a lang.

4. Rahul Gandhi thusawi an ngaihhuat bera ziaka lang chu “Engati nge rukrute hian chhungkaw hming inang Modi tih an put vek (Nirav Modi, Lalit Modi leh Narendra Modi)” tih a ni a. Modi tih zawng zawng kha rukru an ni tihna a ni lo a, chibil tihbik nei a ni hek lo.

5. Nirav Modi leh Lalit Modi te lah Other Backward Classes an ni hek lo a. India rama hnam hnufual OBC te a beihna anga sorkarin a puhna hi mipui sukthlek kawih pen tumna mai a ni, BJP hian eng vanga thi tisualtu leh dan dik lova sum siamtute hi a hauh tlat? 

6. Rahul Gandhi hi politics khawvela a awm tirh atanga loneitute tana ding tlat a ni a, loneitute tawrtawrawt a lo ni tawh thin.

7. Kum 2013 te khan Land Acquisition law te kha Rahul Gandhi rawn thawhchhuahpui a ni a, loneitute venghimtu a ni a tih theih ang. PM Modi khan Land Acquisition Act kha tihdanglam a tum khan Rahul Gandhi bawkin a ni loneitute hamthat nana dodal tlat ni. Tute nge India ramah loneitute chu? kan tih chuan, OBC te leh Dalit te an ni a. Anni hi Rahul Gandhi hian kawng kamah leh Parliament-ahte an thlavang a hauh tlatte an ni nghe nghe.

8. Bharat Jodo Yatra neih lai khan Rahul Gandhi khan hmaichhanah mipui a kawm a, sum tlakhniamna, hna thawh tur vang, khawtlanga inepna leh institution hrang hrangte Adani leh Capitalist hlawkna atana chhuhsakte a takin a hmu a, mipui tan Congress hi a ding zel dawn a ni.

9. Dan mit atanga thlirin Criminal defamation complaints chu a tuartuten case an file tur a ni ang, he case-ah pawh hian hming lamrik ni hauh lovin case a file a ni.