ZALEN January 28, 2026: Nimin tlai dar 4:00 khan Ministry of Home Affairs (MHA) Office, Kartavya Bhavan, New Delhi ah Union Home Secretary hovin MHA Official te leh Central YMA hruaitute an thukhawm a, YMA motor leina tur te, ruihhlo dona kawnga inzirtirna atana hman tur sum leh YMA Conference centre sakna tur sum dah a nih dam te an lo hrilh. 

Meeting a tel tur hian MHA hian Central YMA hruaitute (Office Bearer) 4 an sawm a, President R. Lalngheta hovin Vice President Prof. Lalnuntluanga, Gen. Secretary Prof. Malsawmliana leh Treasurer Er. H. Duhkima te an kal. Union Home Secretary hova meeting ah hian MHA Official bakah IB hotute, Assam Rifles hotute leh BSF hotute an tel a; Mizoram Chief Secretary Khilli Ram Meena a tel bawk. 

Meeting-ah hian March 15, 2025-a Union Home Minister-in Mizoram a rawn tlawh tum a Central YMA leh NGO pawl dang ten an thu thlen bawhzui a nih dan te sawilan a ni a. Chung zingah chuan - ruihhlo dona atana Central YMA hnena NCB kaltlanga motor leina tur sum Rs. 88,95,675/- ruahman a nih tawh dan te, ruihhlo dona kawnga inzirtirna lama hmalakna tur Cheng vaiblechhe 2.3 ruahman a nih tawh thu te; Thingsulthliah rama YMA Conference Centre sakna tura Cheng vaibelchhe 99.7 dah a nih tawh thu te an lo hrilh.

He sawihonaah hian 8th schedule-a Mizo tawng dah a nih theihna tura ngenna chu diltu 150-200 vel an awm avanga Committee dinin an ngaihtuah tur thu te sawilan a ni a, heng bakah hian Mizo thalaite tana Civil Service Coaching Centre buatsaih chhoh mek a nih thu leh AAI kuta Lengpui Airport hlan chungchanga thil awm dan te sawi a ni bawk. 

Meeting ah hian Indo- Myanmar Border Fencing chungchanga YMA ngaihdan zawh an nih angin YMA hruaitute chuan, NGOCC thu ding lai angin ramri hung hian Zofate inunauna a tihchhiat theih dawn avanga hung rih loh an duh thu leh, Mizoram State Assembly pawhin Resolution a lo Pass tawh thu te; Indo- Bangladesh ramri hung-ah Mizoram-in nasa taka ram a chan dan leh khaw engemaw zat hung pawna a awm dan te sawilan a ni bawk. 

Indo- Myanmar ramri hung turah hian Survey neih mek a nih rualin ramria cheng mipuiten ramri hungin a ken tel tur an hriat loh thu leh eng angin nge a nghawng dawn tih inhrilhfiahna a awm loh thu Central YMA hruaitute hian an sawi bawk. Tunah hian Indo-Myanmar Border Fencing atan BRO-in Survey an nei mek a ni.