Aizawl: Minister of State for Environment, Forestry and Climate Change Prakash Javadekar chuan nimin khan Bethlehem Vengthlang a Advanced Research Centre for Bamboo & Rattan tlawhin a hmun hma a fan zawh hnuah State Forest Training Institute Building thar a hawng. Building hawnna programme SFTI tual zawla buatsaihah Union Minister chuan ‘tichhe lova hmasawnna rahbi thar kai’ tih chu a thupui a nih thu a sawi a. "India ramin hmasawnna hna chak taka a thawh lai mek hian min hualtu boruak, thing leh mau leh nungchate tichhe lo zawnga hma lak chu sawrkar duh dan a ni a, he chona hmachhawn tur hian state leh central sawrkar te an pawimawh a ni," a ti. Forest venhimna kawngah mipui an tel tam loh chuan a hlawhtling thei lo tih a sawi a. Mizoram chu mau tamna ram nia sawiin a hman tangkai dan leh suma chan tir dan erawh ngaihtuah a ngaih deuh thu a sawi bawk. Forests Minister Lalrinmawia Ralte chuan kum kalta khan Mizoram forest cover tlema a tlakhniam thu sawiin thing leh mau, nungchate humhalh chunga hmasawnna hna chak taka thawh dan kawngah ngaihtuahna thar sen a tul a ni, a ti. SFTI hawn tak hi kum 2011 khan sak tan niin kum 5 chhunga hawn hman tura ruahman a ni a. Hun bituk aia reilo hretah peihfel hman a ni. State Project Management Unit kaltlanga hna thawh a ni a, sum hi sawrkar laipui MoEF & CC pawmpuina in Japan International Corporation Agency (JICA) atanga hmuh a ni a. Heta tana sum ruahman chu a pumpuiin cheng nuai 547.408 a ni a, cheng nuai 479.347 release tawh niin nuai 458.567 hman ral tawh a ni. MoEF & CC Minister hian mau hmanga eizawngtu bamboo artisans leh entreprenuers te bakah private tree planters te kawmna hun a hmang nghal a. Nimin tlai vek khan Mizoram Governor leh Chief Minister-te an chenna inah a hmu bawk. Union Minister hian vawiin hian Tripura panin Aizawl a chhuahsan ang. Union Minister hi Addl.Director General of Forests, MoEF & CC, Pu Anil Kumar chuan a tawiawm a ni.