Nizan zanlai khan Europa League group stage hrang hrang khelh niin English club pahnih Arsenal leh Manchester United pawh in lanin Man United si thum faia an chak laiin Arsenal erawh an tlawm thung.

Point 12 neia group A hmahruaitu Arsenal hian an hnuai chiaha awm PSV Eindhoven tlawhin season khelh meka an tlawm tum hnihna tawngin si hnih faiin an tlawm. Group E a pahnihna Man United erawh-in an khingpui Sheriff Tiraspol si thum faiin an hneh a, superstar Ronaldo pawhin club tana a goal 701-na a thun a ni.    

Arsenal mualpho zan hian Joey Veerman leh Luuk de Jong ten PSV tan goal an khung a, Man United tan Diogo Dalot, Marcus Rashford leh Cristiano Ronaldo ten goal an khung ve bawk.   

Group A lamah Arsenal hi point 12 neiin an sang ber a, knock out stage an lut tawh bawk a, an hnuai chiaha awm PSV chuan knock out stage an lut ve chiah bawk a, an group game hnuhnung berah PSV nen hian group leader nih an inchuh ang. 

United pawh hi knock out stage lut tawh an ni a, tunah point 12 nei mekin Group E hmahruaitu Real Sociedad aiin point 3 in an hniam. 

Group A inkhelah hian Arsenal an khel chhe hle a, first half a PSV goal hnih khung kha offside avangin sut lo hlauh phei seng chuan an mualpho nasa hle ang. PSV goal hmahruai hi Veerman-a thun niin De Jong-a siam sak a ni. PSV goal hnihna hi De Jong-a tauh luh a ni. Hun tawp dawn lama Cody Gakpo-a goal thun pawh offside vang bawkin an pawm lo va, offside trap siam thiam hlauh lo se Arsenal hi an mualpho hlein a rinawm. 

Group E inkhelha United goal hmasa ber hi Dalot-a tauh luh a ni a, corner atanga Christian Eriksen-a ball siam sak a ni. United goal hnihna hi Rashford-a thun niin Luke Shaw a siam sak a ni. Premier League lama luhna chang lo Ronaldo rawn lang ve lehin United goal thumna a rawn khung. 

Ningani zan score leh result

    PSV Eindhoven 2 - 0 Arsenal
    Man Utd 3 - 0 Sheriff Tiraspol
    Zürich 2 - 1 Bodø/Glimt
    AEK Larnaca 3 -3 Dynamo Kyiv
    Fenerbahçe 3 - 3 Rennes
    Ludogorets 0 - 1 Real Betis
    Union Berlin 1 - 0 Sporting Braga
    Malmö FF 0 - 2 Union Saint-Gilloise
    Lazio 2 - 1 FC Midtjylland
    HJK Helsinki 1 - 2 Roma
    Omonia Nicosia 0 -2 Real Sociedad
    SK Sturm Graz 1- 0 Feyenoord