Man Utd fans te chuan Greater Manchester, Chapel Street-a  Haaland-a kawng kal an hmu fuh hlauh mai a. Zah pawh dawn lovin Old Trafford lama kal turin an ngen tawp mai a ni. 

Manchester City star striker Erling Haaland kawng kal lai, an club lama khel zawk tura an sawm lai hi video hi social media lamah post darh a ni a, United fans te chuan, Haaland chu team dik lo zawk a zawm thu leh Manchester tak tak zawk zawm turin an ngen a ni. 

Fans te chuan, “Manchester dik lo zawk-ah i rawn kal a ni,” tia an auhna chu Haaland chuan tiang zawng hian a lo ngaihtuah daih thung  a,”He hmuna mipui te hian min hmangaih hle a nih hi,” tiin. 

Striker nei mumal lo an nih vanga City zawm an nih thu a pa nen an lo sawi chhuak tawh a, Haaland hian Pep Guardiola lama a kal tura duhthlanna a siam hi a tisualah a ngai hran lo. 

United fans te chuan Haaland chu Red Devils lama kal ngei turin an duh a, “Season tharah chuan United lamah rawn lut ngei ngei rawh aw’” tiin an au lawm lawm a ni.

Premier League lamah, Manchester United hi an insiam that chho mek laiin Europa League group stage-a an game hmasa berah Real Sociedad an hneh lo va, minute 59-naah penalty hmangin Brais Mendez-a’n goal awmchhun hi a thun a ni. 

Red Devils hian an manager thar Erik ten Hag a hnuaiah hmasawn chho zelin, an premier League game hnuhnung pali-ah an chak vek thei. Season hmasa ai khan Manchester City hian player an nei tha chungin, Premier League table-ah a sang ber an ni phak lo thung a. Haaland hian City tan game 7 a khelhah goal 12 zet a thun der tawh.