Season ruk chhunga a vawi nga nan Premier League champion an ni a, a zawnin vawi thum nomawi an la ta bawk a; mahse, engati nge Manchester United leh Liverpool an la tluk loh, hmabak an la nei em ni?

Manchester City boss Pep Guardiola chuan heng club pahnih hi an tluk phak lo deuh niin a ngai a, Pathianni zana nomawi an lak zawhah khan tluk turin hmabak an la nei tih a sawi.

“Champions League hi United leh Liverpool te anga team tha ber pakhat nih theihna turin lak a ngai,” a ti a, Europe inelna sang berah champion nih an la hmabak tih a sawi.

Premier League-ah chuan vawi sarih an champion tawh a, an chungah an thenawm club chiah awmin vawi 13 zet an champion tawh a, Reds hian nomawi vawi khat an la ve tawh bawk a. Khawmualpui huap inelnaah erawh club pahnih lakah hian City hi ‘nau’ tak an la ni thung.

Europe khawmualpui huap inelnaa an champion awm chhun chu kum 1970 daih tawh kha niin tual chhunga cup inchuhnaa champion-te inchuh thin, Cup Winners’ Cup-ah a ni a, tunah phei chuan he inelna hi tihtawp a ni daih tawh.

Pathianni zana English champion nomawi an lak hnuah Guardiola chuan, “Champions League champion nih loh chuan Premier League chu engmah a ni lo tihna chu a ni lo va, ni tin, kar tin inbeihna a ni a, thil ropui tak a ni,” a ti tho.

City hian season 10 liam ta chhungin Premier League-ah vawi ruk leh season 12 liam ta chhungin vawi sarih an champion ta a, heng thil hi a ropui a, sawi nep chi chu a ni hauh lo tih Spanish manager hian a sawi a ni.

Boss-in a sawi anga United leh Liverpool anga ‘insawi thei’ ve tur hian khelh khat an la hmabak a, June 10-ah Istanbul-ah Inter Milan an hmachhawn dawn a, tun hnaia an khelh dan en chuan ‘chelh rual loh’ English champion hi Italian team lakah pawh chungnung zawk turin mi tam takin an ngaih a ni a; mahse, football chu khelmuala chin fel tur a ni.