Premier League table parukna luah mektu Manchester United chuan season thar atangin coach thar Erik ten Hag an nei dawn a, Ten Hag hian talbuai mek United hi a siam tha thei a ngem tih chu mi tam tak inrin siak mek a ni.
   

Tun season-ah game khelh tur a tam tawh loh vangin an beisei Champions League an khel phak lo mai thei. An player tha eng emaw zat chu an contract a zawh avangin season tharah chuan an chhuah rin a ni.
   

Sir Alex Ferguson-a hnuah ngai an awh leh hlei thei tawh lova, 2013 hnua a panga nan a nghetin Man United hian Dutch coach hi a nghetin an lalut leh dawn a ni a, an tifuh a ngem tih chu zawhna lian tak chhan diktheih rih loh a ni. United din thar tur hian Ten Hag hian kum eng zat nge a mamawh dawn tih pawh rin thu bak sawi theih a ni rih lo. 
   

Manager tura Ten Hag an puan chian hma dar 36 khan, United hi an hmelma Liverpool lakah 4-0 in an tlawm a nih kha. An result atang ngawt pawh hian an manager thar hian hna a ngah dawn tih chu a chiang sa reng. 
Eng nge an sawi
   

Scotland midfielder hlui Paul Lambert chuan,"Season hmasa ber atangin Ten Hag hian trophy chawi ngei a duhin a rinawm a, cup chawi miah loh hi chu thil hrehawm tak a ni. Mahse, chutiang ti tur chuan United hi a sawi danglam ve deuh chu a ngai ang," a ti. 
   

Liverpool hero Jamie Carragher thung chuan, "United hian an player mamawh tak an la thei a nih pawhin, insiamtha leh tur chuan kum 2/3 tal an mawmawh ang," a ti. 
   

United defender hlui Rio Ferdinand chuan, "United siamtha tur hian hun a mamawh dawn tih hriatpui a tha. Transfer window pawh tum 2 vel tal chu a paltlang ve phawt a ngai ang. United squad hi a thlak danglam a ngai dawn a, EPL leh UCL champion tur chuan ‘Ten Hag-a squad’  din thar phawt a ngai ang," a ti.
   

Derby County manager Wayne Rooney chuan, "United mamawh em em squad din thar an phalsak ka ring a, chu chu an mawmawh hmasa ber a ni. Fans lam pawhin dawhthei taka an nghah rih an nghai ang," a ti.