Cristiano Ronaldo chuan a career-a a vawi khat nan Europa League-ah goal a thun ve ta. Nizan khan Sheriff Tiraspol nen inhmachhawnin Man Utd tan penalty atangin goal khat a tun a, 2-0 in a team te a chak pui.

Group E-a an game hmasa berah Erik ten Hag-a naute hi an mual Old Trafford-ah ngei Real Sociedad lakah an tlawm a, mahse an game hnihnaah chuan Moldova lamah point thum an hlawh chhuak ve ta thung.

Red Devils hian first half minute 17-naah Christian Eriksen-a siam sak hmangin Jadon Sancho chuan cool takin an hmahruaina goal a khung. First half tawp hma deuhin Sheriff defender Patrick Kpozo chuan box chhungah Diogo Dalot titlu a, penalty a chawi. Penalty pet turin Ronaldo a rawn pen chhuak a, Cristiano Ronaldo chuan club tana a goal 699-na leh Europa League-a a goal hmasa ber a khung. 

Ronaldo hian club tana a goal 700-na turin goal thunna hun tha nei mah se goal-ah a chantir thei ta lo. Sheriff lam hian United keeper David de Gea-a mang tiang thei tur goal hlauhawm an nei lo.