Ningani zana Manchester United nen inhnehtawk tuma Red Devils tantuten Tottenham Hotspurs striker Harry Kane-a an auhna kha kan hre hlawm ngeiin a rinawm.

“Harry Kane, June-ah kan la inhmu dawn nia, June-ah kan inhmu dawn leh nia,” an ti a. Old Trafford-a seng luh an duhna au thawm a ni a, England captain hi United striker duh No. 1 a ni tih chu sapram chanchinbu chaw tui a ni mek.

Spurs captain hian an elpui tantute au ri hi a hre ve tho va, “An thil sawite kha ka hre ve ngei e; mahse, tunah chuan he team (Tottenham)-ah hian ka insawrbing a, a sang thei ang ber thlenpui ka tum,” tiin inkhelh zawhah a sawi.

Kane-a hian tun season hi a zawh chuan Tottenham-ah thla 12 daih chiah contract a nei tawh dawn a, Spurs chairman Daniel Levy-a hian nipuiah hian man man takin a hralh dawn nge risk lain a kawl zui ang a, contract thar a ziah si loh chuan kum tharah man nei lovin a kaltir dawn tih duhthlan tur a nei mek.

United hian lehlam goal hmaa na taka tel thei tur an dap a, tunah Marcus Rashford leh Wout Weghorst nei mah se an duhkhawp lo tih a chiang reng a. Dutch forward phei hi chu mi ta an hawh mai chauh a ni bawk.

Old Trafford club hian kum 29 mi, Kane-a manah hian £ maktaduai 100 thleng pawh thehchhuah an ui lo niin sap chanchinbute chuan an ziak lehzel a. Ani lah hian Alan Shearer-a record siam khuma Premier League-a goal khung tam nih a tum a, ram dang a hawi lo niin a lang bawk.

Hetih lai hian Tottenham pawhin an hnena a rinawm zui an beisei a, dawr pawh an dawr nual tawh a; mahse, an striker hian nomawi lak a duh a, London hmar vengah hei chen awm tawhin ‘teuh’ bawkin season an khar leh thin a, season dang nghah leh nge hmun danga nomawi zawnga chhuah fuh ang tih a ngaihtuah ve tho nia sawi a ni.