American pop rock band Imagine Dragons chuan indona avanga harsatna tawk mek Ukraine mipuite tanpuina tura pawl din UNITED24 tan ambassador hna an thawk dawn. An frontman Dan Reynolds chuan, "Ukraine mipuite kan hmangaih vek che u, intan kan tih theih ang ang kan ti zel ang," tiin a sawi. 

UNITED24 hi Ukraine President Volodymyr Zelensky-a din a ni a, an ram mipui harsatna tawkte tanpuina tura din a ni. He pawl tan hian Ukraine First Lady Olena Zelenska pawh a thawh hlawk hle a, Imagine Dragons te nen hian hma an la ho dawn a ni. Imagine Dragons bakah hian midang eng awm zat pawh ambassador atan hian an ruat dawn a ni. 

"Hetianga dik lo taka chetna do hneh tur hi chuan khawvel mipuite hi kan tanho a ngai a ni. Ukraine mipuite leh an ram hruaitu huaisen President Zelensky kiangah kan ding reng dawn a, UNITED24 tan hian theih tawp kan chhuah dawn a ni. Ukraine khawpui Kyiv-a kan concert leh theih hun tur hi kan thlir reng a, zalenna lawm kan duh a ni. Rimawi nena hlim taka hun hman leh hi kan duhthusam a ni," tiin, Imagine Dragons frontman Dan Reynolds chuan a sawi. 

American rock band bakah hian - football star Andriy Shevchenko, tennis star Elina Svitolina leh actor Liev Schreiber te chu UNITED24 ambassador atan hian ruat an ni a, midang pawh an la ruat belh dawn bawk. Imagine Dragons hian Russia-a concert an neih tur chu Russia-in Ukraine a run an duh lohna lantir nan an lo thulh tawh bawk a ni.