ZALEN Feb 19, 2026: TRANSFORMATIVE INDUSTRIALIZATION SCHEME (UNNATI-2024) chungchangah mipuiten thudik leh he scheme-in a tumte an hriat theih nan Tourism Department chuan hetiang hian sawifiahna a siam.

Unnati Scheme hi North East State te Industry Sector-a hma an sawn theihna tura Back ended subsidy 50% thlenga claim theihna tura duan a ni a. He Scheme hian Tourism Sector- Hotel, Homestay, Picnic Spot leh Resort etc. te pawh a huam a ni. 

Unnati Scheme hnuaia incentive hmuh theihnate chu – Capital Investment Incentive (CII), Capital Interest Subvention (CIS) leh Manufacturing & Service Link Industry (MSLI) te an ni. Tun din hmuna mipuiin an hriat fiah tul ni a lang chu, Capital Investment Incentive (CII) hi a ni a. He incentive hi GST pek ngai chiah leh GST pek ngai loah then hran a ni a, GST pek ngaiah hian incentive sang thei ber chu Rs.7.5 Crore a ni a, Rs 7.5 Crore incentive hmu tur chuan Project Cost hi Rs. 15 Crore aia tlem lo a nih a ngai a. Chutih laiin, GST pek ngai lo Industry-ah chuan Rs.10 Crore hi incentive hmuh san theih ber a ni a, Project Cost chu Rs.20.00 Crore aia tlem lo a nih a ngai thung. Mi thenkhatin incentive hmuh san theih ber Rs. 250 Lakh nia an sawi hi an hriatsual palh a nih a rinawm. 

Tourism Department chuan Unnati Scheme hi a tam thei ang berin hmang tangkai se a duh a, District leh khaw hrang hrang tlawha official-te an zinchhuahnaah an sawi darh zel thin.

Tourism Sector-a Unnati dil tur hian a hmasa berin Department atanga ‘Consent to Establish’ lehkha neih a ngai a. Director, Tourism Departmentah Consent Letter hi dil tur a ni. An hmun hmate endik a nih hnuah Consent Letter hi issue thin a ni. Unnati Scheme hnuaia incentive hmuh tuma project nei te hian Bank Loan an la tlangpui a, Bank Loan laa bul tan an nih chuan documents pawimawhte an neih kim hnuah an project hi an loan lakna Bank ten Appraisal an tihsak tur a ni a. Mahni sum hmanga bul tante erawh chu NEDFI in Appraisal an tih sak tur a ni.Documents tul te an neih vek hnuah Commerce & Industries Department ten Portal ah an upload sak tur a ni.

Unnati Scheme hi DPIIT enkawl a nih angin DPIIT hian documents leh a tul dangtea a diltute puitu turin Grant Thornton Company atangin Consultant pakhat chu Mizoramah an dah nghe nghe a ni.Tourism Sector bik atan chuan incentive hi an infrastructure siam te an zawh hnu, an Hotel/Homestay leh a dangte an operate hnu, Tourism Department registration an neih fel vek hunah chauh claim hi an hmu thei ang.

He Scheme hi extend a nih loh chuan ni 31 March, 2026 hma ngeiin Portal-ah documents kimchang nen dilna upload hman tur a ni a. Vawiin ni 19 February, 2026 thleng hian Tourism Department chuan Consent to Establish hi mi 44 tan a pe chhuak tawh. Heng mi 44 te hian Unnati Scheme hnuaiah incentives hmuh an inbeisei vek avangin Loan an la a nih pawhin, Unnati Scheme behchhana Bank Loan la anga ngaih vek an ni.

#ZalenNews