Aizawl October 2, 2022 : Chief Minister Zoramthanga chuan upa te tawnhriat leh finna an chharte thalai taksa la chak tha ten hmang tangkai se a duh tih a sawi. Thangthar te zingah a changkang apiangin upa te hlutna an ngaipawimawh thin a ni, a ti.

Nimin Zemabawk North Area MUP buatsaih Upate Ni lawmna ah he thu hi sawiin Chief Minister Zoramthanga chuan upa te hlut zia sawiin, "Bible min hrilh ang in kan pawnlam taksa hi awng rawp telh telh mahsela, kan chhunglam thlarau erawh chu nitin simtharin a awm tih hi a dik hle a. Kum upat ang zelin finna leh thlarau nunah kan nghet tulh tulh a, tangkai lo emaw kan in ti mai ang tih ka hlau thin a, kan tangkai telh tlh zawk thin a, thangthar te zingah a changkang apiangin upa te hlutna an ngaipawimawh thin a ni," a ti. 

Chief Minister chuan upat lam hman thiam a pawimawh tih sawi bawkin, "Ni danga kan tih ang kan ti thei tawh lova, phurrit zawnga hman leh lungngaihnana kan hman chuan Pathianin kum tam min dam tirna lallukhum min pek hi phurritah kan ngai tihna a ni dawn a ni," a ti bawk.