ZALEN, May 28, 2926: Aizawl East District PYD hnuaia Environment Protection Committee hmalaknaa Chite lui then fai hnatlangah North East UPC thalaiten bawlhhlawh bag 270 vel an chhar.

Ningania lui then fai hnatlangah hian Aizawla pastor bial hrang hranga PYD member 200 chuang thawk chhuakte hian Bethlehem Vengthlang kâia Chite lui tih fai hna an thawk a, Sanitation Department-in bawlhhlawh paih motor a hmantir hmangin garbage bag 270 vel an chhar khawm chu an paih a ni.

Aizawl East District PYD Environment Protection Committee hian environment humhalh kawngah hma lain hman khat daih plastic chungchang inzirtirna an nei thin a, tuihna leh ramngaw humhalh a nih theih nân hma an la mek bawk.

Chite lui thiana hnatlang hi UD&PA Department-in a sponsor niin Aizawl Dy. Mayor R. Lalawmpuii bakah Environmental Activist Vanramchhuangi (Ruatfela Nu) leh ASEP President K. Lalmuansanga ten an telpui a ni.