UPSC Challenge Inter College Quiz Competition 2022-ah HBC an thiam ber
Mizo Students’ Union (MSU) buatsaih ‘UPSC Challenge Inter College Quiz Competition 2022’ chu nizan dar 8 khan Ignite Studio, Khatlaah zawhfel a ni ta a, Gov't Hrangbana College te pakhatna an ni. Gov't Saiha College te chu pahnihna an ni a, final-ah hian vanduai zawkah an tang a ni.   

Final-ah hian Gov't Saiha College chuan Table 2 pawtin table 1-ah Govt Hrangbana College te an awm a, round 5 a intihsiak hnuah Govt Hrangbana College hian point 80 hmuin pakhatna an ni a, point 55 hmutu Govt Saiha College chu pahnihna an ni. 

He intihsiakna ah hian Participants bikte tan zawhna 533 awmin, heng zingah hian zawhna 189 chhan dik a ni a, zawhna awm zawng zawng atang hian 35.5% chhan dik a ni. Intihsiakna neih chhung hian Andy L. Khobung, 5th Semester, Govt Hrangbana College chuan zawhna 20 lai chhang dikin Quiz participants te zinga ti tha ber ‘BEST QUIZZEE’ lawmman a dawng a ni.

Inter College Quiz Competition hi August 25 atang khan tan a ni a, Mizoram chhunga College hrang hrang 22 ten intihsiakna hi hmachawnin, zawhnate hi UPSC Syllabus behchhana siam vek an ni. Aizawl chhung atangin College 11 an tel a, Aizawl pawn atangin College 11 an tel bawk. 

Final zan hian Vintage Business Enterprise neitu Lalremfeli khuallian a ni a, khuallian chuan. "Hlawhtling tur hian mi fa nih a ngai lova, Pathian tanpuina dawng tur chuan a dawnthlengin kan zir ve a ngai a ni," a ti. Thusawitu dang MSU President J.Lalmuanzuala chuan ‘UPSC Challenge Inter College Quiz Competition hi thalaite rilru sukthlek siam danglamna atan leh, Civil Service lama an ngaihtuahnate a kal theihna atana buatsaih a nih thu a sawi bawk. 

UPSC Challenge Inter College Quiz Competition 2022 - ah hian lawmman atan pawisa fai Rs. 35,0000/- semral a ni.