Union Public Service Commission (UPSC) in January 2021-a a buatsaih Civil Services Examination, 2020 result chu tihchhuah niin Mizoram atangin Mizo an lang loa, IAS, IFS, IPS leh Central Services group A leh B te an ni a. Hetih lai hian ram chhung mi diktak nia  Mizote  pawm loh  atangin tling an awm thung a, hei hian titi a ti tam hle a ni. Mizoram Youth Commission (MYC) in Delhi-a IAS coaching kal tur thalai 20 a thlan chhuah 'Super 20' te chu MYC in a sponsor hunchhung a zo tawh a, thla thar laihawl hian a UPSC in Civil Services preliminary examination an hmachhawn ve leh dawn a ni.

Hun engnge maw chen atang khan UPSC civil services exam leh central lam hna dangah Mizote inziah tlin hleih theih tak loh avangin vei a hlawh a, mi tlawmngaite'n buaipuiin a bikin a IAS hi bitum ber pakhat chu a ni a, vawiin thlengin hlawhtlinna a awm hleithei lo a ni. Heng service ah hian Mizote inpha man turin an tlin loh hlauhna a lian ta hle a, sawrkar hna lianah hreh tak chung siin hnamdang hnuaia awm loh theih loh hun a la thleng ngei dawn tih a lang ta.

Mizote UPSC exam an tlang theih loh chhanah hian Mizoram chhung nawm tih vanga duh tawk ta mai niin ngaihdan te a awm tawh a, ram leh hnam thil a nih tawh avangin thi leh thau pawlh tak meuha tan lak a hun tawh hle mai. Tun hnaia civil services exam result chhuakah state danga hnamhnufual te pawh thahnem tak an tling tho a, an theih ang hi Mizo thalaite'n an theih lohna tur bik a awm lo a. Tunhmain Mizo tling an awm foa, tun a taka tlin theih loh thu a awm loa, kan hmachhawn danah a diklo laite enfiah zelin taimakna nen thapui chhuah a hun tak meuh tawh a nih hi.

Tunah phei chuan sawrkar hial a inrawlhin Mizoram Youth Commission (MYC) chuan  thlanchhuah Super 20 tia sawi thin te tan mi pakhatah cheng nuai 2 vel a seng a, hripui leng karah hnamdang pawh an tling tho a, anni pawhin theihtawp an chhuah turah beisei ila. MYC hian kum tharah hian UPSC exam tura thlannaa a ti tha sponsor hi 40 an tihpun a tum a, 'silaimu kahchhuah a tam deuh leh a fuh tawk a awm mahna' tia duan nite pawhin a lang.

MYC in UPSC exam tura 'thlanchhuah 20' anga hma a lakna hi a tha khawp mai a, bul tan tirh a nih khan nasa taka vawrh lar a ni a, a hlawhtlinna la hmuh hmaa lo rik chiam hi politic kaihbua chang thei niin thalai bawkin an tuar thei a, midang ti zel tur an tim phah thei bawk a, helaiah hian insum a tha ang.

Eng pawh nise thla thar maia exam hmachhawn tur thlanchhuah te mi mit an chungah a fu a, hei ringawt pawh hi delhtu lian tak a ni tawh a, an hlawhtlin ngei theihna turin mipui fuihna an mamawh khawp ang.