South America khawmualpuia ramte football-a an inelna sang, Copa America chu nakumah hian an khawmualpuiah nghat lovin United States-ah khelh a ni dawn a, an khelhna tur khelmualte pawh puan a ni ta.

Ram leh ram inelna tournament upa ber, Copa America vawi 48-naah South American nations ram 10-te bakah North American ram paruk an inlan dawn a, US-a state 10-a khelmual 14-ah an inkhel dawn.

South America-a football thuneitu, CONMEBOL chuan 2024 Copa America hi June 20-ah Mercedes-Benz Stadium, Atlanta-ah hawn a ni ang a, July 14-ah Hard Rock Stadium, Miami Gardens, Florida-ah final khelh a ni dawn tih an lo puang lawk tawh.

Thawhtanni khan CONMEBOL chuan khelmual 12 dang a puang leh ta a. AT&T Stadium, Arlington, Texas; NRG Stadium, Houston; State Farm Stadium, Glendale, Arizona leh Allegiant Stadium, Las Vegas, Nevada te chuan quarter-final inkhel pali an thleng dawn.

Semi-final pahnih hi MetLife Stadium, New Jersey leh Bank of America Stadium, Charlotte, North Carolina-ah khelh a ni thung ang.

Khelhna tur hmun dangte hi Q2 Stadium, Austin, Texas; SoFi Stadium, Los Angeles; Levi’s Stadium, Santa Clara; Exploria Stadium, Orlando, Florida leh Children’s Mercy Park, Kansas City-ah a ni dawn a ni.

Group stage hi June 20 atanga July 2 thleng khelh a ni ang a. Quarter-final hi July 4 leh 6 inkarah, semi-final chu July 9 leh 10-ah khelh a ni ang a, July 13-ah pathumna zawnna inkhel a awm ang.

“Group pahnihin khawthlang leh ram lailiah an khel ang a, group dang pahnihte chu khawchhak leh ram laili hmun dangah an khel ve bawk ang,” tiin CONMEBOL chuan thu a chhuah.

“Inelna hi khawthlang atangin khawchhak hawiin a kal dawn a, quarter-final-te hi khawthlang leh ram lailiah khelh an ni ang a, semi-final leh final chu khawchhak lamah khelh a ni thung dawn a ni,” an ti bawk.

Copa America hi South America ramte inelna a nih angin an khawmualpuiah deuh hlir nghah thin a ni a, US hian Mexico leh Canada te nen 2026 World Cup an thleng dawn a, chumi inbuatsaihna atan nakum inelna hi a thleng dawn a ni.

“He ram ropui takah hian football hi khawchhak atangin khawthlangah, hmar atangin chhimah a luhpui dawn a, phurna nasa tak nen khelmualah fan sang tel leh khawvel hmun hrang hrang atangin thlirtu maktaduai tel a hip khawm dawn a ni,” tiin CONMEBOL president, FIFA vice president ni bawk, Alejandro Dominguez chuan a sawi.

Copa America-ah hian champion lai chu world champion Argentina tho an ni a. Ningani hian intum turte pawh a ni dawn a ni.