Google chuan kumin chhunga United States bika musician lar leh mipui ten an chanchin an zawn nasat list an tichhuak a, Adam Levine chuan dinhmun sang ber a luah. Ber nihna a hauh dan erawh a lawm awm vak lo - Instagram model Sumner Stroh-i'n an inkar a sawi chhuah vanga ngaihvetu ngah a ni. 

Instagram model Sumner hian September thla khan Adam Levine nen an inkar hi a rawn sawi chhuak a, hei hian mipui a barakhaihin an chanchin hian ngaihven a hlawh hle a ni. Kum 43 mi Adam Levine hi nupui nei lai a ni a, a nupui Behati Prinsloo chuan an fa pathumna tur a pai mek. Victoria's Secret Angel Behati leh Adam Levine te hi kum 2014 khan an innei a, fa pahnih an nei a, a pathumna tur an pai mek a ni.

Hetiang a nih mek lai hian Sumner hian Adam Levine nena an inkar a rawn sawi chhuak heu mai a, boruak pawh a rawn nei lian hle a nih kha. An chanchin hian ngaihven a hlawh a, hei vang hian Levine pawh hian internet lamah zawngtu a ngah phah a ni. 

Google-a zawn hlawh zingah hian Levine bakah - Mary J. Blige, Lil Tjay, Kendrick Lamar leh Migos te chu a langsar zual an ni. Musician ni lem lo, milar hrim hrimah chuan Johnny Depp leh Amber Heard te chu mipuiin an chanchin an zawn nasat ber zingah an tel. Academy Award 2022-a Chris Rock kut thlaktu Will Smith pawh top 5-ah a lang.