US Open a champion hnua tournament a khelh leh hmasak ber Indian Wells-ah Emma Raducanu chu a inlan vawi khatnaah Belarus Aliaksandra Sasnovich-i lakah 6-2, 6-4 in a tlawm. 

He inkhelh-ah hian Raducanu-i hian unforced error tum 31 zet neiin British nula duhawm hian break point tum 11 zet nei mahse, unseed leh ranking 100-na Sasnovich lakah a theihna a lan chhuah tir thei lo. 

An inkhel zawha press conference an neih naah Emma Raducanu chuan tawnhriat a la neih tam tawk loh vang leh tour-a mi thar mai ala nih vanga round khatna pawh pal tlangzo lo a nih thu a sawi. An result atangin zirtur zirlai thar a neih thu a sawi bawk. 

Raducanu-i chuan,"Zan lama inkhelh hi chu a danglam fo thin a,  zana khelh kawngah hian tawn hriat ka la nei tlem em a, tour-ah hian mi thar mai ka la ni. Tawn hriat ka neih belh zel anga, ka khel tha chho ve zel turah ka ngai. Vawiin ka result avang hian ka lawm tho e, achhan chu zirlai zir tur ka neih belh phah a, hmalam panin ka kal zel ang,” a ti. 

“Ka match khelh dan kha uluk takin in lamah ka en let leh vek ang a, chuta tang chuan ka chak lohna lai chu ka hre theiin ka ring” tiin Emma Raducanu chuan a sawi.

Emma Raducanu-i hian US Open a Champion hnu lawk khan champion puitu a coach Andrew Richardson chu banin, tawnhriat nei tha zawk midang enkawlna hnuaia awm a thlang a nih kha.