Aizawl March 14, 2023 : Lunglei, Siaha leh Lawngtlai District a kuthnathawktute tharchhuah Mizo hmarchate (Bird's Eye Chilli) Kg. 7500 chu Nevada, USA a thawn turin vawiin khan YMA Run, Haulawng, Lunglei District atangin Agriculture Minister C.Lalrinsanga chuan a vailiam.. 

Mizo hmarchate USA a thawn chhuah hi International Competence Centre for Organic Agriculture (ICCOA) leh Mission Organic Mizoram (MOM), Department of Agriculture te tangkawp hmalakna niin Mission Organic Value Chain Development for North Eastern Region (MOVCD-NER) hnuaia hmalakna a ni.

C.Lalrinsanga chuan Mizo kuthnathawktute tharchhuah ngei USA market a thleng tur chu a lawmawmin a ropui tiin ICCOA, MOM leh Farmer Producer Company (FPC) te thawrimna leh inpekna rah a ni, a ti a. Mizoramah FPC hlawhtling kalpui mek a ni chuan Cooperative Concept anga hnathawh a that zia a ti lang chiang hle a ni tiin kuthnathawktute hmasawn zelna turin Agriculture & allied Departments ten hetianga hmalak hi uar zawkin kalpui zel se a tih thu Agriculture Minister hian a sawi a ni.

Manoj Menon, Executive Director, ICCOA pawhin thu sawiin Bird's Eye Chilli thawn chhuah tur sample chu uluk taka test hrang hrang paltlang niin Nevada USA ah Final testing neih a ni a, chemical engmah hmuhchhuak lovin Organic Standards Protocol test hi tha takin an paltlang a ni, a ti a. Mizoram sawhthing leh aieng te pawh demand a san thu sawiin state dang leh ram pawnah te thawnchhuak thei turin Farmer Producer Company (FPC) ten en hmalak tlan zel an tum thu a sawi a ni.

PC Lalawmpuii, ICCOA chuan technical report a pe a. Mizo hmarchate (Bird's Eye Chilli) 7500kg thawnchhuah tur hi Lunglei, Siaha leh Lawngtlai District a Farmer Producer Company (FPC) 12 hnuaia kuthnathawktute tharchhuah a ni a. International Competence Centre for Organic Agriculture (ICCOA) leh Mission Organic Mizoram (MOM) te tangkawp hmalaknain Lawngtlai District-ah FPC 6, Siaha District-ah FPC 3 leh Lunglei DisExternal Audit of Organic Certification endikna vawi hnih hlawhtling takin an paltlang tawh a ni.

Hmarchate phurtu motor hian Visakhapatnam, Andhra Pradesh thleng phurin hemi atang hian USA ah thawn leh a ni ang. Sus Agri Development Pvt Ltd, Bengaluru, Karnataka te nena tangkawpin USA ah thawn a ni ang.