Aizawl; Mizoram State Tobacco Control Society chuan thuchhuah siamin 'Cigarette and other tobacco product acts 2003( vaihlo khuahkhirhna dan) section 7' in a tarlan angin Vaihlo hralh chhuahna reng rengah 40 % khuhin vaihlo in hriselna a khawih chhiat theih dan (Vaukhanna thu) a lem leh a thu tarlan tur a ni, a ti. MSTCS chuan hei hi tarlan a nih loh chuan COTPA 2003 section 20 na hmangin a zuarchhawngtu te chu kum 1 lungin tan emaw Rs 1000/- chawitir emaw a pahnihin hrem theih an ni a, an tihsual vawi hnihna ah phei chuan kum 2 lungin tan emaw, Rs 3000 chawitir emaw a pahnih pawhin hrem theih an ni a. A siamchhuak tu te pawh an vawikhat tihsual na ah kum 2 lungin tan emaw Rs 5000 chawi emaw a pahnihin chawitir theih an ni a, an tisual nawn leh a, man an nih chuan kum 5 thleng lungin tan leh Rs 10,000/- thleng chawitir a hrem theih an ni, an ti. Mizoram thenawm ram Burma leh Bangladesh atanga meizial lo lut kan hriat lar Farstar, Hummer, Winbody, Porai leh adang ten he dan hi an zawm loh mai piah lamah tax pawh mumal takin an chhunglut lo niin MSTCS chuan an sawi a. Foreign cigratte a Pictorial Health warning chuang lote chu zuar tawhlo turin an ngen a, zuar lui an man te chu Court ah an thawn zel tawh dawn niin an sawi. Hei bakah tualchhung atanga siam zozial, tuibur leh sahdah ah pawh a hlauhawmzia tarlanna hi dah zel a ngai niin an thuchhuah chuan a tarlang bawk.