ZALEN January 23, 2025 : PWD Minister Vanlalhlana chuan vawiin khan National Highway NH-6 Kawnpui atanga Khamrang kawng thawm that mek a endik a, Vairengte leh Sairang inkar bik chu NHIDCL kuta awm tur a nih thu a sawi a, mipui mamawhna avangin Mizoram sawrkar chuan a enkawl lailawk a ti.

Vanlalhlana chuan, “Mizoram Ei leh bar lakluhna kawngpui Vairengte atanga Sairang inkar National Highway NH-6 hi NHIDCL kuta awm niin engemaw hna laklawhna avangin Mizoram State sawrkar chuan mipui mamawhna hriain a enkawl lailawk ta a ni. Mizoram sawrkarin a enkawl hnu hian a thawh khat nan he kawngpui thawmthat nan nikum lam khan Nuai 75 sen a lo ni tawh a, December 25, 2024-a NHIDCL kuta awm leh tura ruahman a nih laiin, NHIDCL te hian an lak tak si loh avangin Mizoram Sawrkar chuan State pawisa a remchang ang ang pawt khawmin, vawiin ni thleng hian mipuite mamawhna hriain a enkawl chhun zawm leh rih ta a ni,” a ti.

PWD Minister chuan, “National Highway NH -6 thawmthat hna hi kumin January 20, 2025 atang khan a tum hnih nan thawh tan leh a ni a, tun tumah hian Cheng Nuai 125 ruahman niin February ni 15 a siam zawh tum a ni a, sum ruahman sa hian a daih hmel loh avangin sawrkarah dilbelh leh mek a ni a, ngawrh taka siam mek a ni," a ti bawk.

Minister chuan, “Mipuite harsatna kan hria a, chumi chhawk zangkhai turin Mizoram PWD kawng enkawl ni miah lovah mawhphurhna kan la a ni a, chuvangin mipui leh Lirthei neitute pawhin Sawrkar thahnemngaihna min hriathiam pui thin se kan duh hle a ni. Nitina kan mamawh kan phurhluhna kawng hi mipuiten kan dim thiam a tul takzet a, a tichhe tu ni lo a, dimdawi taka enkawltu kan nih theuh ka beisei a ni,” a ti bawk.

Hetihlai hian ZALEN thudawnna chuan NHIDCL lam chuan Forest Clearence a fel loh avangin NH-6 hi an la chhawng rih lo niin a sawi ve thung.