ZALEN June 19, 2026 : BJP Mizoram ten vawiina Edible Oil (eirawngbawlna têl) renchemna campaign 'Awareness Campaign on Edible Oil Conservation Programme' an neihah BJP Core Group Member K. Hrahmo, MLA chuan Rajya Sabha inthlana vote an thlak loh chhan chu central lama an hotute thurawn vang leh Vairengte pel lo MP neihin awmzia a neih thui loh avang a ni pakhat, a ti.

Mizoram Rajya Sabha inthlana vote an thlak lo chhan sawiin K Hrahmo chuan, "BJP MLA ten Vote kan thlak loh chhan chu Central-a kan hotute thurawn anga kal kan ni a, chumi piah lamah BJP Candidate ni lo kan thlan leh dawn tho avang leh Vairengte pel lo MP neih hian awmzia a neih thui loh avangin a ni pakhat. MP awmze thui tak nei Dr C. Silvera ang kha Mizoram hian kan nei ve thei a, chutiang MP kan neih theih hun chu kan nghakhlel a ni," a ti.

K Hrahmo hian Rajya Sabha MP atana thlan thar K. Laltluangkima a lawmpui thu sawiin, a kal zelna turah duhsakna a hlan thu a sawi bawk a ni.

'Awareness Campaign on Edible Oil Conservation Programme' a resourse person pahnih, BJP State Jt Treasurer, Lalremsangi Fanai leh Zohmingthangi, Local Council Member, Upper Republic te'n Edible Oil (eirawngbawlna têl) renchem a tul dan chungchang sawina hun an nei a ni.