Aizawl February 14, 2023: Association for Voluntary Blood Donation (AVBD), Mizoram State AIDS Control Society (MSACS) leh blood bank-te tangho chuan vawiin February 14 khan Mizoram hmun hrang hrangah Valentine's Day pualin thisen pek rûnpui an huaihawt a, thisen unit 1,032 pek a ni.

Valentine's Day Blood Donation Camp 2023 hi Mizorama blood bank 11-ah huaihawt a ni a; huaihawtna pui ber, Aizawl-a Chanmari YMA Hall-ah chuan AVBD, MSACS leh Civil Hospital Blood Bank-te'n an huaihawt. Music Domain Mizoram-in an pui a, zaithiam thahnem tak an zai bakah, thisen pek chungchang leh HIV/AIDS chungchangah inzirtirna hun hman a ni. Chanmari YMA Hall-ah hian mipa 166 leh hmeichhia 66-te'n thisen unit 232 an pe.

Aizawl-a thisen pek rûnpui hi Health minister Dr R Lalthangliana'n a tlawh a, thalaite'n an ngaihhlut em em Valentine's Day chu mi dang tana malsawmna nihna remchang atan hmang a, thisen pek rûnpui huaihawt a ni chu V-Day hman dan tha ber pawl nia a hriat thu a sawi.

Health Minister chuan, thisen mamawhtu an awm reng tih sawiin, Mizo thalaite chu mi nunna chhan tura thisen pek uar zel turin a sáwm a, thisen an pek zel theih nan nun uluk turin a chah bawk. Minister hian thisen pek rûnpui huaihawtnaa senso phuhrûk nan AVBD hnenah Rs 10,000 a pe a ni.

MSACS atangin HIV/AIDS chungchanga hriat tur leh invenna tura pawimawhte inzirtirna hun hman a ni a, AVBD Secretary (Publicity) K Zothanpara'n V-Day puala thisen pek dinhmun tlangpui leh, tum khata thisen tam tak pek aia thisen pek ngun a that zawk dante a sawi bawk.

AVBD president C Lalnunnema chuan, V-Day puala thisen pek rûnpui huaihawta thisen petute zawng zawng chungah an lawm thu a sawi a; Chanmari YMA Hall thlang kawngpui PWD-in an siam mek pawh an dil angin nimin bikah chawlhsan rih a nih thu sawiin, sorkar leh PWD hotute chungah an lawm tak zet thu te, hall hmantirtu Chanmari Branch YMA, a remchan ang anga sum beisei loa puitu MFM School of Nursing leh kawng hrang hranga puitute chungah an lawm tak zet thu a sawi bawk.

THISEN PEK ZAT
1. Aizawl Civil Hospital -   232 (M-166, H-66)
2. Synod Hospital -            200 (M-150, H-50)
3. ZMC -                            100 (M-65, H-35
4. Lunglei -                        150
5. Siaha -                           94 (M-68, H-26)
6. Champhai -                   93 (M-80, H-13)
7. Kolasib -                        73 (M-49, H-24)
8. Serchhip -                      1 (M-5, H-6)
9. Lawngtlai -                    60 (M-52, H-8)
10. Mamit -                       19 (M-13, H-6)
TOTAL -                            1,032