Manchester United-in pre-season friendly an khelh hnuhnun ber tur, Rayo Vallecano an hmachhawn hunah Cristiano Ronaldo chu squad-ah telin a tel ngei rin a ni.  

Kum 37 mi Ronaldo hi, chhan hrang hrang vangin United-in pre-season an khelhna hmun Thailand leh Australia lamah a inlan ve lo va, zanin a Rayo Vallecano  an hmachhawnnaa erawh a tel tur thu Italian journalist Fabrizio Romano chuan Instagram-ah a sawi. 

July thla tir lam khan Athletic chuan, Portuguese superstar hian Red Devils chhuahsana club dang zawm a duh niin an sawi. Hetia Old Trafford a chhuahsan duh chhan hi Champions League football khelh a duh vang niin an sawi bawk. 

Tun thlengin Europe club lian tak tak zawm mai theiin Portugal captain hi a la awm mek a, a hma hun tur a chiang thei rih lo.  

Sawi dan pakhatah chuan United coach thar Erik ten Hag's-a’n nasa zawka club kal phung leh practice dan thar a kalpui kawngah hian Ronaldo hian dimhmun tha a chan loh a hlauhthawn vangin club hi a chhuahsan duh nia sawi te a awm bawk. 

Season hmasa nipui lai khan Ronaldo hian Juventus atangin a tum hnih nan Premier League club lian United hi a zawm a, season liam ta khan match 38 a khelhah goal 24 a thun a ni.  

A mimal angin chetha mah se team angin United hi an chetha lo hle a, Premier League-ah parukna ni phak hramin tun season-ah UEFA Champions League an khel phak dawn lo a ni. Player mala champions League record nei tha ber Ronaldo leh a agent te chuan Champions League khel phak club dang zawng bawk mah se an hmu mai rih lo. Ballon d'Or tum nga dawng tawh Ronaldo hi goal chu la thun thei viau mah se a kum a upa ve deuh tawh bakah a hlawh a tam dawn em vangin a vanglai a pel ve deuh tawha ngaitu an tam a, hralh a tla vak tawh lo a ni.

Scotland defender Alan Hutton chuan United squad lama Cristiano Ronaldo let leh hi senior player thenkhat ten zawhna an ngah phah hle niin a sawi. Football Insider hnenah Hutton chuan,“A bik takin changing room piah lamah zawhna thahnem tak a awm ka ring. Eng thil nge thleng chiah hi hriat ve ngei an duhin a rinawm. A mimal thil chu a nih ngei a rinawm a, mahse amah vang hian an club chhung boruak a chhiat phah ve thei tlat a ni,” a ti.