ZALEN July 20, 2026 : Vawiin khan I & PR Mini Theatre-ah Chief Minister Lalduhoma chuan Vanapa Hall & Park Architectural Design lawmman dawngtute hnenah lawmman a hlan.

Assam Rifles ram chhuahsana hmalakna kal mekah Nodal Department UD & PA chuan Vanapa Hall & Park Architectural Design inelna a buatsaih a, Catalyst Architecture Studio chuan lawmman pakhatna an dawng.

Catalyst Architecture Studio neitu Lalrinzuala Ralte hian 35th JK Indian Architect of the Year 2026 lawmman a dawng tawh bawk a ni.

Chief Minister chuan Aizawl khawpui hmel thar leh mipuite tana hman tlak, mawi leh him taka Hall leh Park sak a pawimawh thu sawiin, PM-DevINE hmanga project hi kalpui tum an nih thu a sawi. 

UD & PA Minister K. Sapdanga pawhin thu sawiin, Aizawl hmel thar, changkang tak, mipuiten an hman tangkai tur, miten an tlawh chak em em tur sawrkarin a duang mek a, a taka chantir thuai kan tum a ni a ti.

Inelna hi March ni 17 ah khan neih tan a ni a, firm 33 an tel a, an zingah hian state pawn lam firm te pawh an awm. May ni 15 ah khan firm 16 in an design an theh lut a, an zinga 14 chu pawm a ni a. Endiktuten endikna chi hrang hrang an kalpui hnuah a titha zual firm 6 an thlang leh a, chung mite chuan an design chu endiktute hmaah an sawi fiah leh a, endikna kalpui nan hian thla 3 chhung zet hun hman a ni.

Architectural Firm pathumte hnenah Consolation Prize leh firm dang pahnih (2) hnenah Honorarium hlan an ni a, chungte chu:

Consolation Prize (Certificate of Appreciation) dawngtute chu:

1. Studio Hamlet

2. Forbattra Architects

3. Tiberia

Honorarium dawngtute chu:

1. Okahito Consultancy Services

2. HTL Architecture & Landscape Design Studio

Vanapa Hall & Park Architectural Design Exhibition pawh UD & PA chuan I & PR Conference Hall-ah tun thla ni 22 thleng tlawh theih turin an buatsaih nghal bawk a ni.