ZALEN July 28, 2026: Mizoram Pradesh Congress Committee chuan FCRA Amendment Bill mai bakah tun Parliament Monsoon Session-a pass tur zinga te tho Vande Mataram National Song humhimna tur Bill sawiho a pass turah pawh ngaihtuahna sen a ngai dawn niin an sawi.

Aizawl Press Club-a vawiina chanchinthar lakhawmtute an kawmnaah MPCC chuan he hla hi tun hma pawn sak thin a ni a, mahse, Mahatma Gandhi leh Congress hotute khan Hindu pathiannu te chawimawina chang chu telh lo ni se an lo ti a, tunah chuan Vande Mataram hi an pathiannute chawimawn nen National Anthem sak hmaa sak tur a ni tawh dawn, an ti.

He hla sak lai hian a thei chuan zawm a din vek tur tih thupek a rawn awm dawn a, thupek awih lo te hremna pawh siam a ni dawn bawk a. Tunah pawh sawrkar official function-ah chuan an sak tir fo tawh a, mahse Naga unaute chuan sak chu sawi loh din pawh an ding duh lo ngam niin an sawi.

MPCC chuan, "Keini Development duh huam huamte hian kan rinna in a pawm pui loh, an pathiannu Durga leh Laksmi te chawimawina sak puii kan din dawn nge development leh therhlo min tiamte awh vang leh strategic importance-a kawngpui pasarih min puan sak a, Peace City din sak min tiam chuan kan dingin kan sak pui dial dial mai dawn? Mahni theuh inzawt ang u," an ti.

Parliament Monsoon Session-a FCRA Amendment Bill, Christian te tin zawn ni ngeia lang, Central Sawrkar in pass a tum duh lohna lan tira Black Day/ Protest Day an hmang chuan Mizo mipui leh Kohhrante a kai harh ta deuh nia a hriat vang leh Sawrkar pawh a thang harh ve deuh nia an hriat avanga lawmthu an sawi.

MPCC te chuan Black Day an ni a sawrkar hmalakna tura an phut thil pathum ah ten an dinna ngaiah an la din reng thu an sawi a, Kohhran hotute hma theh a hmang mai lova hma hruai a, an thil phutte ti hlawhtling tur hian Mizoram sawrkar leh CM hi an ngen nawn leh bawk.