November 23, 2023; Nimin (22.11.23) a Mizoram hmun thenkhat a vanduaina thlengah hnamdang 3 an thi.

Nimin chawhma dar 10 vel khan Bairabi leh Sairang inkar Rel kawng siam mek-a Kawnpui Rel Station tur bulah lei a min a, hnathawktu pahnihin nunna an chan a ni.

Kawnpui Rel Station tur bula hnathawh mekah hian khawl (Hitachi) hmanga hnathawh niin laih rem ngai deuh te chu mihring tha hmanga laih a ni a, hetihlai hian lei hi min thutin Railways Ministry hnuaia RL Construction Pvt. Ltd. hnathawk mi pahnih Dipak Datta (27) leh Durga Prasad Passi (53), Machak, VTC Mosaka, Nagoan District, Assam-te chhilhin, an nunna an chan phah a ni.

Vanduaina thlenga boral mi pahnih te ruang hi Kawnpui Damdawi In-ah postmortem niin an khaw lamah an ruang hi lak a ni.

Hetihlai hian nizan dar 7:30 bawr vel khan Lawngtlai leh Siaha inkar, Tuipuiferry-ah mi panga chuanna lawng a chesual a, mi 4 te him taka chhanchhuah an ni a, pakhat chinhriat loh in a la awm a, zawn mek zel a ni.

Chin hriat loh a awm hi hnamdang niin, Tuipuiferry-ah inhlawh a awm a ni.