Aizawl: Chief Minister Lal Thanhawla chuan vantlang tana thil pawi mawh capital assets te mipui ten kan dim tawklo hle tih sawiin, "Sawrkar leh vantlang thil te hi duat taka mahni ta anga kan enkawl hi kan zavaia mawhphurhna a ni ti kan hriat tlan a hun tawh hle a ni," a ti. Nuai 1877.40 senga sak Lunglei Convention Centre hawnna Zirtawpni a neih ah he thu hi sawiin Chief Minister chuan Lunglei Convention Centre hawn a ni ta chu Lung lei District tan hmasawnna rahbi pawi mawh tak tukna ni anih thu sawiin, "Mizoram hi kan thangzelin, hma kan sawn zel a, hun a lo inher chhoh avangin tun hmaa kan mamawh loh te chu thil mamawh leh tul a ni tawh a, Covention Centre changtlung tak hi tunlai khawvel thang zelin a mamawh a ni a, Aizawl pawha la awm lo Convention Centre hawna a ni ta chu thil vanneihthlak leh a lawmawm a ni," a ti bawk. NLUP chungchang sawiin Chief Minister chuan NLUP hian sum leh pai leh ei leh bara intodelhna thlen a tum piah lamah khawvel lum chho mek 'global warming' tih ziaawm te, tui hna kang chat mekte siam that leh ramngaw chereu tur ven te a ni a, hengte tunlai khawvel mamawh niin hei hi UNO pawhin a ngaihven hle a, chuvangin UNO agency pali inzawmkhawmte chuan Aizawl-ah pisa neiin an in bun tawh a ni, a ti a. NEDP chu NLUP chhunzawmna leh NLUP a hlawhtling te puihna tur anih thu a sawi a ni. CM chuan Mipui kalkhawmte chu a chhe lai siam that chu sawrkar mawh leh mipui mawh angkhat anih thu hrilhin ram leilung faten neitu rilru pua kawng engkima thawhho a ngaih thu a sawi bawk. Convention Centre hi cheng nuai 1877.40 senga sak niin Ministry of Urban Development chu Funding Agency niin, Implementing Agency hi NBCC Limited an ni a, UD &PA Department chu Nodal Agency an ni thung a. M/S Stup Consultants Pvt. Ltd. chu Consultant niin a satu contractor hi M/S Trilok & Associates an ni. He project hi March ni 30, 2010 a sanctioned a ni. Lunglei Convention Centre hi RCC Frame Structure niin Mizopa chhiar a chhawng 7 a sang a ni a. Office atan hman theih tur floor te, quarters, khualzin tena an hman tur platform pali leh ticket lakna, railway out agency, driver room, choka leh canteen, ruaithehna hall te a awm. Heng bakah hian facilities changkang tak nei mezzanine floor, VVIP leh VIP thlenna tur suite 3 a awm tel a. Mi 200 len theihna Air conditioned hall changtlung tak sound leh projector awm sa a awm a. Chhawng tinah inthiarna mipa leh hmeichhia leh rualbanlo te tana hman tur a awm bawk a ni. Convention Centre hawn inkhawm hi UD&PA Minister Zodintluanga chuan a kaihruai a, Transport Minister John Rotluangliana leh LAD Minister P.C. Lalthanliana te chu khualzahawm niin Lunglei High Powered Committee Vice Chairman S. Laldingliana leh Lunglei West bialtu MLA Pu Chalrosanga Ralte te an tel bawk.