Juventus midfielder Paul Pogba chu misual ralthuam keng ten vauin pawisa tam tham tak an dil a, chutiang buaina vang chuan Pogba hian football khelh chawlhsan mai a duh tawh niin a thianpa Boubacar Camara chuan a sawi. 

A ṭhian hnai tak Camara chuan Pogba hi an pawisa bat thing nia insawi silai keng ten vau-in pawisa an dil niin a sawi a, chu in vauna leh inrikrapna chu amah Pogba chuan tawrh thiam harsa a tih bakah a mimal nun thlengin harsatna a tawh phah niin a sawi. 

Camara chuan JDD hnenah,"Pogba leh ka unaupa naupangte chu hoode ha ralthuam kengin thah emaw rukbo-ah an vau a ni. Heng tlangvalte hian kum sawm leh pathum chhung zet an humhimin an enkawl tawh tih an hrilh a, tunah chuan chumi man chu an pek let ve a ngai tawh nia sawiin euro maktaduai 13 an dil a ni," a ti. 

Heng thil te avang hian Pogba chuan football khelh chawlhsana tlan bo daih a duh zawk hial thu a hrilh niin a thianpa chuan a sawi bawk. Hemi thu a thianpa a hrilh lai hian Pogba hi a tap hial niin a sawi a, Paul hian a fate, a nupui leh a chhungte a hlauhthawnpui takzet niin a sawi bawk.

He thil thleng hi French ram thuneitute chuan an chhui mek a, chutih laiin Pogba-a u Mathias chu custody lamah hren mek a ni bawk.