Khelmual leh a pawn lama kan lo hmuh ve phak chinah chuan pa nungchang tha, thu awih thei awm tak a nih laiin Lionel Messi pawhin thu a awih reng bik lo. Club phalna lova a zin avangin Paris St-Germain-in an hrem a ngai ve tlat.

Argentina captain hi phalna nei hmasa lova a zin avangin a khelh mekna club hian chawlhkar hnih chhung an hrem (suspend) a. Hetih chhung hian a train lo vang a, a inkhel lo bawk ang a, pawisa pawh an chawitir ang.

French club hian Pathianni zan khan an mualah Lorient hneh lovin Messi-a pawh a khel tluan a. A hnu lawkah an chhungkuain Saudi Arabia-ah an zin ta daih a ni.

Kum 35 mi, nikuma World Cup nomawi latu hian sumdawnna thila zin chhuah hi club-ah chuan a dil ngei a; mahse, phalna pek a ni lo.

Paris club tana vawi 71 inlana goal 31 thun tawh leh a thiante tana thun tur vawi 34 siam tawh, Messi-a hian Troyes leh Ajaccio an hmachhawn hunah khelmual a lut ve thei dawn lo va. Tunah hian Ligue 1-ah khelh nga la hmabakin season 11 chhunga vawi kua champion nih nan point ngain hma an hruai fal mek.

Tun hnaiah PSG forward hian chanchin neuh neuh a nei thei hle a, tun nipuia French club-a a hun neih hmang zo tur, tun thlenga la ziah belh lo a ni a, a naupan lai atanga a lo khawsak tawhna, Nou Camp lam nen sawi zawm an ni leh mek.

Barcelona vice-president Rafael Yuste chuan March thla daih tawhah khan Spain-a la let leh turin an be tawh tih a sawi tawh a. Tun hnaiah hei hi ri ring zualin president leh a pa, a agent ni bawk, Jorge te pawh an lo inkawm tawh.