ZALEN, Dec. 05, 2024: Tun hnaia India-a MRF MoGrip Supercross National Championship neih zawh taka round ruk tlana vawi li lai dawhsan lawn thei leh Private Expert category-ah India No. 3 ni thei, Shaun Lalremruata Chhangte chu Nilaini khan Mizoramah a haw a, Lengpui Airport-ah Amawii Hero bultuma lo hmuah a ni.

Kum 23 mi, Shaun-a hi India ram pum huapa kawng rualrem lova intlansiaknaah khan Private Expert-ah vawi thum leh Indian Novice category-ah te dawnsan lawn phakin a awm a. Private Expert bikah phei chuan a pum puiah India-a 3-na a ni phak.

Shaun-a hi Private Expert-ah hian Bhopal, Madhya Pradesh-ah 2-na niin Pune, Maharashtra leh Bengaluru, Karnataka-ah 3-na a ni ve ve a. Round hnuhnung ber, Cochin, Kerala-ah erawh a chet thatna huangah hian a bike chiankuan loh vangin dawhsawn a lawn phak lo va, Indian Novice-ah erawh 3-na a ni phak leh ta tho a ni.

Mizoram atanga hetiang inelnaa tel hmasa ber, Shaun-a hmuahnaah hi Amawii Hero-in engkim buaipuiin airport-ah a puala hun hman a ni a. An chenna inah YMA hruaitu leh veng chhung mi leh thenrual thaten lo hmuakin zanriah an kilho bawk.

Bike khalh thiam hmuahnaah hian an chenna, College Veng, Aizawl local council, YMA, a chhungkua leh thenrual thate bakah a team, GroundRule Racing an tel.

A chhungte chuan lo buaipuitu, Amawii Hero chungah leh YMA hruaitu leh veng chhung mite chungah lawm thu an sawi a.

Pune leh Bangalore-a intlansiaknaa tawiawmtu leh leh MiMSA chungah an lawm tak zet tih an sawi bawk.