ZALEN September 18, 2024 : Food Civil Supply & Consumer Affairs inspecting Staff te chuan vawiin khan Aizawl huamchhunga POL Filling Station te dinhmun endikin an tlawh kual a, he thu buatsaih lai thleng hian Oil phur beisei tur la nei tlem azawng an awm a, vawiin khan POL pechhuak an awm bawk. FCS&CA atanga thu dawn danin Tank Lorry beisei tur a la awm.

Vawiin khan Aizawl hmar lam venga Filling Station pahnih Hriattiri leh Hauva Filling Station te chu khar an ni a, Hriattiri Filling Station, Falkland hian thleng tur an nei a, Hauva erawh hi chuan beisei tur an nei rih lo.

Zemabawk Filling Station chuan HSD thleng hlim an nei a, Petrol hi bituk neiin an free sale. Endik an nih lai hian Hrangbana chuan Petrol hi bituk neiin an free sale a, HSD an free sale lo a, thleng tur an nei lo. Zangena chuan coupon bakin Petrol an pe lo a, HSD hi bituk neiin an free sale.

Aizawl chhimlama Filling Station pahnih khar an ni a, Lalnghakliana Energy Point-ah vawiin khan Petrol leh Diesel bituk awmin an free sale a, Lalnghakliana filling station chu an tanky dead stock a nih tawh avangin an pechhuak lo. Mizofed, New Capital leh Mizofed, Treasury-ah te an tank lorry rawn thleng te an unload hnuah bituk chin awmin free sale nghal a ni. Aizawl By-pass road pump chuan free sale a pekchhuah tur an nei lo a, thleng tur an nei lo bawk.

Petrol leh Diesel te hi free sale tih a sawi a nih rual hian Scooty-ah tanky khat tawk bak an pe lo a, two wheeler gear nei hovah litre 5 pek niin four wheeler-ah litre 10 pek an ni a, Disel pawh pek theih chin bithliah a ni.