Vanlalawmpuia leh F Zoramchhana te chuan a vawi khat nan India ram pawnah professional boxing an khel dawn a, vawiin chhun dar 12:30 hian The Fighter-ah Thai boxer an bitum dawn. An inhnekna hmuh hi Thailand khawpui Bangkok a ni. 

Vawiin July 2, inrinni hian Spaceplus, Bangkok-ah The Fighter, world boxing huaihawt a ni dawn. Inhnek panga awm tur zingah Awpa'n super lightweight-ah Aekkawee Kaewmanee a hmachhawn ang a, super bamtamweight-ah Zotea leh Yutthana Kaensa an innuai ve thung dawn a ni.

Mizo boxer pahnih te inhnek hi kan en duh a nih chuan LPS pay-per-view atangin en theih a ni ang.

India super lightweight number one Awpa'n round ruk khelh zawh ngai lova chak ngei a tum tih a sawi a, professional a luhchilh atanga vawi li a inhnek tawhah tlawm nei lovin tum thum a chak.

A beih tur kum 40 mi Kaewmanee erawh vawi 40 inhnek tawhin tum 24 a chak a, vawi 16 tlawm tawhin a inhnek hnuhnun tum hnihah a tlawm zawn a, mahse, khawtual mi a nih angin mipui tan hlawh zawk ni chungin 'The Animal' Awpa a bei dawn a ni.

Zotea'n a inhnek tawha pawimawh em em leh a hma lam hun hril tur a ni tih a hre chiang a, professional huangah vawi thum inhnek tawhin a tir vawi hnih a chak zawn hnuah November 27 khan Aizawl-ah Sandeep Singh Bhatti lakah a tlawm.

Kawng hrang hrangah Kaensa nen khaikhinin rin a kai zo lo viau a, chuti chungin 'WBA Asia Flyweight champion ni tawh leh world title chuh tawh Kaensa-an hnuhma leh sulhnu a neih tawhte ngaihtuaha a rilru tihbuai a tum lo' tih a sawi.

'The Mizo Flash' Zotea chuan : "Thai boxer pakhat, a hneh theih ngei tur nen an intawng dawn a, chutiang rilru pu chung chuan hruihrual chhungah ka lut dawn a ni," a ti.

Kaensa hi vawi 21 chak tawhin tum thum a tlawm a, June tir kha a inhnek hnuhnun ber niin harsa lo takin a chak. Amaherawhchu, an khelh thina flyweight aia rit super bantam-a inhnek tur an nih avangin Cherhlun tlangvalin hamthatna neih phah a inbeisei.

Inhnek pui berah Mohammad Zamani leh Tewa Kiram chuan WBA Asia super welterweight title an inchuh dawn a; Afghan boxer Zamani hi tum nga a inhnek tawhah chak vekin mi pathum a knockout.

A beih tur Thai chhuanvawr Kiram hian January 2018 khan US-ah WBA welterweight title a chuh tawh a, Argentine boxer hmingthang Lucas Matthysse hneh lovin hei hi a tlawm awm chhun a ni a, tum 46 hnehna chang tawhin knockout-in vawi 33 a chak.

Welterweight huangah Indian professional boxer zinga dah sang leh vawi thum WBC Asia champion ni tawh Neeraj Goyat chuan Rachata Khaophimai a nuai dawn a, Thai fighter Khaophimai hi vawi 12 a inhnek tawhah tum 11 chak tawhin tum khat chiah a tlawm a ni.

Hmeichhe inhnek pakhat a awm dawn a, Delhi boxer Shivani Dahiya leh Thai nula Sundania Looksaikongdin an intawng dawn a ni.