Aizawl March 10, 2023 : Vawiin khan State Legal Services Authority, Aizawl chuan awlsam zawk leh sum leh pai sen ngai lova thubuai remna, Lok Adalat a huaihawt. He hunah hian thubuai chi hrang hrang rel niin leiba rul theilo thubuai te, maintenance te, family disputes te, labour dispute leh loan recovery dispute chungchang te an ngaihtuah a ni.

Vawiina thubuai an ngaihtuah zat hi 108 a ni a. Thubuai chinfel hlut zawng chu Rs. 27,77,585/- a ni. Gov’t Mizoram Law College-a LLB zirlai 62 zetin internship neiin Lok Adalat proceedings-ah hian an tel a ni. State Legal Services Authority hian regular takin Lok Adalat hi a huai hawt thin a, hei bakah hian district tina District Legal Services Authority te leh High Court Legal Services Committee te pawhin an area chhungah Lok Adalat hi an huai hawt thin a, a tul dan azirin mobile lok adalat te pawh huai hawt a lo ni tawh thin a ni.