Aizawl: Animal Husbandry and Veterinary (AH&Vety) department hotute chuan tunlaia vawk leh ar natna chuan ziaawm lam a pan thu leh vawksa leh arsa chu ei a pawina a awm loh thu an sawi a. Fimkhur tur erawhin mipuite an chah. AH&Vety department hotute chuan Zalen zawhna chhangin tunlaia thlalak thehdarh arsa ei vanga mihring bawl vak nia tarlan chu department-in an hriat ngai loh thu leh thutlinga an ngaih loh thu an sawi bawk. Arsa leh vawksa hriatchian chu ei a him tih AH&Vety hotute chuan an sawi a. Vawk leh ar damlo leh treatment la lai mek ei erawh chu a hlauhawm tih sawiin zuar lo tur leh talh lo turin mipuite pawh an ngen thu an sawi. Tunlaia ran natna PRRS leh Swine fever te chu inkai awlsam tak anih thu AH&Vety hotute chuan an sawi a. Ran damlo hnaiha kal mihringte pawhin an ran natna kai lo hnenah an kai thei tih sawiin fimkhur turin mipuite an chah a, ran hmanga sumdawngte leh sa talh tute pawh fimkhur turin an chah. Sa damlo talhte chu dan anga hrem theih an nih thu  department hotute chuan an sawi a. District hrang hranga hri leng dinhmun an lakkhawm mek thu leh hri lengin ziaawm lam a pan mek thu an sawi bawk.