ZALEN October 26, 2025: Aizawl khawpuia thla khat chhunga vawksa ei ral zat chu qtls. 12,000 chuang a tling a. Hetihlai hian Aizawlah vawksa man tihsan tumna a awm hran lo nia thudawn a ni.

ZALEN thudawn danin Animal Husbandry & Veterinary department (AH&Vety) chhinchhiah danin, thla khat chhunga Aizawl khawpui a vawksa eiral zat chu quintals 12,450 (kg. 12,45,000) a tling a, chhinchhiah danin vawksaah Mizoram a la intodelh lo a, lak luh phal a nih chuan state pawn atangin lak luh thin a ni.

Hetianga vawksa ei ral a tam tham hle lai hian a bikin Aizawl khawpui chhungah a hranpaa vawksa man tihsan tumna a awm lo tih Aizawla vawksa zuar thenkhatte chuan ZALEN an hrilh a, hetianga vawksa man tihsan tumna a awm loh lai hian vawk man erawh tun hnaiah a sang hle tih thu dawnnate chuan an sawi.

“Kg-ah Rs. 500 hisapin vawk man an chhiar tlangpui tawh a, kan tan chuan a man tihsan pawh nise awmzia a awm lutuk chuangin a rinawm loh,” an ti.

Kar kalta lam khan Aizawl bazar hmun thenkhatah vawk misa tel lo kg-ah Rs. 500, a misa tel kg-ah Rs. 450-a zuar an awm a, hemi kaihhnawih vang hian veng thenkhat local council chuan sawrkar thu a awm hma loh chuan an huam chhungah vawksa man tihsan an rem tih loh thu thuchhuah an siam a ni.

Hetihlai hian AH&Vety department lam chhinchhiah danah, March 21, 2021 khan Lungsen khuaah Mizorama African Swine Fever (ASF) case hmasa ber report a ni a. August 3, 2025 thleng khan ASF vangin vawk 69,411 an thi tawh.

Hri leng darh zel tur ven nana suat (culled) 52,194 a awm a. Chhungkua 11,424 nghawngin, Rs. Vbc. 982.16 hu vel chan tawh anga chhut a ni.