Aizawl: Comptroller & Auditor General of India chuan Mizoram sawrkar sum vaibelchhe 4 chuang chu a awmna chin hriat a nih loh thu leh PWD chuan kum 2016-17 chhungin vaibelchhe 58 chuang budget-a awm lo an hman thu report-ah an tarlang. Mizoram Legislative Assembly Session neih zawh taka Finance Minister Lalsawta’n House-a a pharh CAG report tarlan danin October 2009 atanga March 2013 inkar chhung khan Chakma Autonomous District Council (CADC) chuan km. 36-a thui, LongpuighatKukurduleya kawng siamna atan vaibelchhe 11.29 an dawng a. Kawng siamna atan hian vaibelchhe 8.42 hman a niin a dang vaibelchhe 2.87 hmanna chu a chiang lo niin a tarlang. CAG report tarlan danin sum hmanna hriat loh vbc.2.87 zinga nuai 170 chu Chief Executive Member leh a dang nuai 78 chu District Council Member-te hnenah hlawh atan pek lawk tiin a tarlang a. CADC chuan District Council Member-te hnena nuai 78 pek chu hmuhlet leh a ni tiin CEM hnena nuai 170 pek nia sawi chu chhui mek a nih thu CAG an hrilh a ni. CAG report tarlan danin Superintendent of Excise & Narcotics, Serchhip district hnuaiah vaibelchhe 1.76 hman dik lohna a awm niin a tarlang bawk a. August 2010 atanga January 2017 inkar chhung khan salary bill 92 hmangin vbc.3.83 lak chhuah turah vbc.5.59 lakchhuah a ni tih a tarlang a. Pawisa hmanna hriat loh vbc.1.76 chu department lamin an chhui mek niin a tarlang. CAG report chuan Champhai BDO hnuaia Border Area Development Programme kalpuinaah nuai 3.24 hman dik lohna a awm niin a tarlang a. Report tarlan danin kum 2013-14 chhunga BDO office-in mi 90-te tana electrical repairing, desktop publishing leh mobile repairing training a kalpuinaah nuai 3.24 hman a ni tiin hemi hnu hian a hmaa voucher chu siam danglamin nuai 3.24 bawk hi lakchhuah leh niin a sawi a.  He thil thleng chungchangah hian Department lam chuan thil awm dan an chhui mek niin CAG hi an hrilh a ni. CAG chuan heng a chunga thil thlengah hian sawrkar tan hlohna a awm avangin FIR thehluh tur nia a ngaih thu a sawi bawk.