Aizawl: MNF Vice President Dr. R.Lalthangliana chuan, “Mipui rethei taka kan awm mek laia Lottery-a vaibelchhe sing chuang kawngbo a awm hi a lungchhiatthlak tak zet a. A mawhphurtu chhui chhuaha hrem ngei a tul tak zet a ni,” a ti. Nimina Chhipphir Community Hall-a vantlang inkhawmah he thu hi sawiin Dr. Thangtea chuan State Lottery-a sum kawngbo chu CAG meuhin report-ah chiang takin a ziak a, palzam mai mai chi a ni lo tih a sawi a. Dr. Thangtea chuan, “Pathianin Zoram hi ram tha tak leh hausa tak min pe a, chutih chung chuan dinchhuahpui nan kan la hmang lo a. MNF kan sorkar chuan SEDP hmangin hma kan la tak tak dawn a, Zoram hi dinhmun sang takah kan hlang dawn a ni,” a ti bawk. Dr. K.Beichhua, MLA pawhin Congress Party chu sum hmanga inlei tlin leh tumin sum an hmang nasa hle tih a sawi a, “An sum ngah hi an buai phah a, an mahni leh an mahni an intibuai nasa hle. Sum ngah hi tlinna a ni ber lo tih chiang takin a lang a ni,” a ti a. Zoram kawng a chhe em em reng mai chu pawi a tih thu sawiin, “|halah contractor an ngam lo va, kawng an siam thei lo va, fur a lo ni a, ruah a sur avangin kawng an siam thei lo bawk a. Kawng siamna hun an nei thei lo a ni,” a ti.