ZALEN Oct. 21, 2024; Home Minister K Sapdanga chuan kum thar February thla a village council inthlang hman turin inbuatsaihna kalpui mek a ni, a ti.

Inrinni (19.10.24) a Kawnpui Police station leh Mualvum a First IR battalion hmunpui, Kawnpui leh Hortoki khuate a tlawhna-ah K Sapdanga chuan, an party in sorkarna chang mahse Village Council tam zawkah party dang VC an la tam zawk avangin hmasawnna hnathawh a harsa tih a sawi a. He mi vang hian sawrkar chuan hmasawnna thawh a nih thuai theih na'n a rang thei ang bera VC inthlan buatsaih a tum a, February thla-a inthlanna hi neih hman turin inbuatsaihna kalpui mek a ni, a ti.

Home Minister chuan, police lak thar turah online hmanga dilna thehluh theih turin buaipui mek a ni, a ti bawk a. Police indaihlohna phuhru turin sawrkar-ah police hna ruak 1,100 hnawhkhah dilna thehluh a ni a, chutihlai chuan, sawrkar sum dinhmun a that loh avangin police 290 lak phaksak a ni a, kar leh maiah police lakna tur Advertisement hi tihchhuah tum niin, online hmang pawha dilna thehluh theih turin buaipui mek a ni a ti. Mipuiin police te lakah beiseina an nei sang a, rim taka hnathawh a ngaih bakah mipui nena thawhhona tha neih a pawimawh a ni, a ti.