ZALEN January 24, 2025 : Rajya Sabha MP K. Vanlalvena, MNF Gen. Hqrs Adviser chuan vawiina Hnam Run chhung inkhawma a thusawinaah VC/LC inthlan tur chungchang te, Hmarcha, Hmunphiah, Sawhthing leh Kuhva rah chungchang te a sawi a, ZPM thil kalpui dan tha a tih loh thu a sawi.

K. Vanlalvena chuan, "VC/LC inthlan tur chungchangah, hripui, tam tla leh ramri buai ang chi, chhuanlam sawi tur ZPM sawrkar hian a nei lo, ZPM sawrkar hian party rilru puin ram ro a rel a ni. MNF party chuan ram hmangaihna thinlung puin ro a rel thin. MNF term liam taah pawh Covid len nasat hma in VC/ LC inthlanna neih zawh vek hman a ni, Covid hrilen avangin thla ruk pawh sei a ni. Congress term ah pawh LC/ VC term pawh tawi a ni ngai lo MP chuan," a ti.

Rajya Sabha MP chuan, "Hmarcha hi englaimahin a rate a chhe ngai lo, Sawrkar inrawlh a tul lo. Hmunphiah hralh chungchangah MNF a inrawlh ngai lo, a chingtute leh a lei tute an indawr mai thin. Congress hun laiin 'Hnam chhantu pawl' kaltlangin a inrawlh a a buai vek zawk a ni. Sawrkar pawh a inrawlh chhunzawm duh tawh lo. ZPM sawrkar a inrawlh a Sundar Ali sawi thìn khan Sundar Ali thiante ho 'Vai Company' tho an dawr leh si. Hmunphiah lei tura an biakte leh Sumdawng lian dang ten buaina neiin Hmunphiah hralhnaah harsatna kuthnathawktute chuan an tawh phah zawk a ni," a ti bawk.

Sawhthing chungchang chu MP a nihna angin Committee-ah China atanga India in la lut tawh lo tur a a duh thu sawiin, "North East State atanga Sawhthing thar chuan India ram a chawm theih thu a sawi. India ram a Sawhthing thar tam ber Madhya Pradesh-ah ni hnih ka chama a, kum hnih/thum liam ta atang a Sawhthing an chin tam tawh loh thu leh State dang atanga an lakluh tawh zawk thu thuneitu ten min lo hrilh. Heti hi a nih chuan ZPM inrawlh miah lovin, MNF Sawrkar inrawlh miah lovin, kum 2022-2024 chhung khan rate tha takin Sawhthing ching tuten Sawhthing an hralh thei a ni. State dang thar chhuah zirchiang sela, ZPM sawrkar hi inrawlh lo se Sawhthing ching tute hian rate tha zawkin an hralh thei ang," K. Vanlalvena chuan a ti.

Kuhva ro chungchang sawiin, "Myanmar atanga lo lut MNF hunlaiin an sawisel luai luai a, MNF min mawhpuh a ni. ZPM an sawrkar hnuah a ngai rengin Kuhvarah ro chu a lo lut reng tho a, MNF hun laia sawiseltute kha an ngawi ta ṭhap a, khatih hunlai a sawisel tute kha an dik lo a ni, engatinge tunah an ngawi tlat ni, kei chuan Kuhvah ro lo lut hi tha ka ti lo, ka do zel ang. ZPM sawrkar khan Campaign laiin Kuhvarah ro ram dang atanga lo lut hi an tih tawp theih thu an sawi. Ti tawp thei tur angin mipuiah an inzuar a ZPM sawrkar hian an ti tawp ngei tur a ni," MP chuan a ti.