ZALEN Sept 2, 2025 : Chhim Veng, Serchhip Village Council President PC Siamliana chuan an khawtlang thianghlim nana dan an zam angin ama fapa ngei chu khawlaiah a meizial bung a paih avangin Rs. 20 a chawitir.

VCP-in pawisa a chawi tura a hriattirna lehkha hi social media-ah pawh a darh nasa hle a. ZALEN-in a biaknaah PC Siamliana chuan an in chhung ngeia bul a tan chu mi dangte lakah pawh khauh taka dan a kenkawh theihna atana remchang a nih thu a sawi.

Chhim Vengah hian faina chungchanga hmalatu, Gram Sabha thukhawm chuan an venga a hmun lova bawlhhlawh paih leh a neitu tel lova ran chhuahte chu Rs. 20 chawitir zel thu VCP hian ZALEN a hrilh a. An dan thar siam hi chawlhkar hnih vel an kalpui tawh tih a sawi.

A hmun lova bawlhhlawh paih vanga pawisa chawitir hi an la tam lo tih VCP chuan a sawi a, a neitu tel lova ran chhuak erawh eng emaw zat an man tawh a, a neitute chawitir pawh an awm nual tawh a, hei vang hian tunah chuan mipuite pawn an dan siam chu an zawm tha hle tawh niin a sawi.