Mizoram police chuan thuchhuah siamin social media ah tanpui ngaite tana vehbur khawn an tam thu bakah an zingah hian rintlak loh an awm avangin fimkhur turin mipui an chah a. Hriat chian leh rintlakte hnen ah chauh tanpuina pe turin mipuite an chah bawk a. Social media-a vehbur khawn zingah thenkhat chuan an pek tam azirin sum dawn let theih dan a siam thin niin an thuchhuah chuan a tarlang bawk a ni.

Harsatna emaw chhiat na nasa tak tawkte tanpui hi mihring anga kan tih tur a nihna chen a awm a. Mizo phei chuan kan ban phaka awm an nih phawt chuan tanpui ngaite tanpui kan duh thin a ni. Tunhma kha chuan midang kan tanpuiin mi hriatpui lemloa tih thin kha a ni a, hun engnge maw lai atang khan midang tanpuina pek thin chu social media a tarlan a ni ta deuh zel a,  hun a inthlak danglama tam tak chuan tunah chuan nasa taka puanzar kan duh ta zawk niin a hriat a. Midang puih duhna  tak tak a nih chuan a thaah ngai phawt ang.

    Khawvel thiamnain hma a sawn ang zelin vehbur khawn  pawh social media kaltlanga tih a ni ta deuh zel a, heng zingah hian a tam zawk chu mi harsatna sutkiang duhte an ni a, mi tam tak an pui tawh a, thil tha an ti a ni. Chutih rual in thil tak tak nilo buaipui mi rinawm lo an awm thu police te’n an han sawi ta mai hi a zia lo hle mai a. Heng mite hi a tak taka hma la thinte nen hriat pawlh lo ila, mipui lam pawhin a tak leh a lem thliar thiam ila midang tanpui hi uar sauh sauh zawk ang u.