Aizawl: Grape atanga siam chhuah, grape wine zawrh diltu mi eng emaw zat zinga vendor pahnih - N. Joshua leh Khanluni te chuan sawrkar phalnain grape wine an zuar chhuak tan.

ZALEN thudawn danin vendor pahnih grape zuartute hi Zarkawta khawsa, N. Joshua leh Phunchawnga khawsa, Kanluni te an ni a. Anni bak hi chu zuar chhuak an la awm lo a, tunah hian mi thenkhat chuan permit-te siamin challan an buaipui mek thung.

Mizoram pumah grape wine zawrh phalna hi mi 48 hnenah pek a ni a, Aizawl district bikah chuan mi 19 hnenah pek ni mah se mi pakhat a inhnuhdawh leh tak avangin vendor license nei mi 18 an awm mek a ni.

Hnahlan leh Champhai winery atanga wine siam chhuahte hi sawrkar thupek angin zu tel zat (alcohol content) hi 12% aia sang lo tur a ni a. Hnahlan winery atanga siam chhuah ‘Ísabella’ hi um khat (750 ml) chu Rs. 500 a ni ang a, Champhai winery siam Çhamp wine' chu um khat Rs. 300 a ni thung ang.

Mizoram sawrkar chuan grape wine litre khatah excise duty Rs. 10 leh VAT 16% a la mek nia thudawn a ni. 

Horticulture department chhinchhiah danin nikum 2022 khan Hnahlan hian grape quintal 1,500 tharin heta tang hian Rs. 90,00,000 an lei chhuak a. Champhai leh a chhehvela lo neituten quintals 1,244.88 thar bawkin heta tang hian Rs. 68,69,899 an lei chhuak a ni.